संगमेश्वरात ‘उच्च उपकेंद्र’ सुरू करा
क्रांती व्यापारी संघटना ः दोन महामार्गांमुळे विकासाला गती
सकाळ वृत्तसेवा
संगमेश्वर, ता. १७ ः ऐन पावसाळ्यात, वादळवाऱ्यात सलग दोन-चार दिवस संगमेश्वर बाजारपेठवासियांना अंधारात काढावे लागतात. यावर उपाय म्हणून संगमेश्वर येथे नवीन अति उच्च दाबाचे विद्युत उपकेंद्र सुरू करावे, अशी मागणी क्रांती व्यापारी संघटनेने केली आहे. मागील दीड वर्षांपासून त्यांनी हा प्रश्न विविध नेत्यांपुढेही मांडला आहे.
संगमेश्वर तालुक्यातील आरवली आणि निवळी येथे उपकेंद्र आहेत. संगमेश्वर तालुक्यात आरवली केंद्रामधून विद्युत्‌पुरवठा केला जातो. आरवली ते संगमेश्वर २५ किमी अंतर आहे तर संगमेश्वर ते देवरूख हे १६ किमी अंतर आहे. देवरूख येथे २५ किमी उच्च विद्युतदाबाची ३३ केव्ही विद्युत्वाहिनीची आवश्यकता आहे. आरवली ते देवरूखदरम्यान संगमेश्वर, साडवली व देवरूख अशी तीन उपकेंद्र आहेत. तालुक्यातील भौगोलिक परिस्थितीचा आणि राहणीमानाचा अंदाज घेता गावागावात विद्युत पुरवठा करण्यासाठी घनदाट जंगल, दऱ्याखोऱ्यांतून विद्युतवाहिन्या आणि खांब नेण्यात आले आहेत. पावसाळ्यात झाडाच्या फांद्या, वेली यामुळे विद्युत पुरवठा वारंवार खंडित होतो. ते बिघाड दुरुस्त करण्यासाठी दोन-दोन दिवस लागतात. देवरूख शहराचा विस्तार वेगाने होत आहे; पण विद्युत पुरवठा हा बेभरवशी आहे. दोन राष्ट्रीय महामार्ग जवळ असल्याने अनेक उद्योजकांना देवरूख सोयीचे ठरत आहे. येथे दर्जेदार शिक्षणसुविधाही आहेत. त्यामुळे देवरूख शहराचा प्रगती आलेख उंचावत आहे.
देवरूख शहरात ४० हजाराहून अधिक घरगुती ग्राहकांना आणि ५ हजार व्यावसायिक ग्राहकांना विद्युतसेवा महावितरणमार्फत पुरवली जाते. याशिवाय झपाट्याने वाढणाऱ्या लोकसंख्येचा विचार करता विश्वासार्ह विद्युतसेवा देण्यासाठी देवरूखजवळ नवीन ईएचव्ही सबस्टेशन उभारावे, अशी मागणी जोर धरत आहे.

चौकट
उपकेंद्रासाठी दोन ठिकाणे
उपकेंद्र उभारण्यासाठी ताम्हाणे, बुरंबी ही ठिकाणे सुचवण्यात आली आहेत. ही उपकेंद्रे सुरू झाली तर तालुक्यातील वीजग्राहकांना स्थिर आणि अखंडित विद्युत पुरवठा करणे शक्य होईल. त्यामुळे देवरूख भागातील औद्योगिक विकासाला गती मिळेल तसेच या परिसरातील सर्व क्षेत्रांत समृद्धी येईल. त्यासाठी देवरूख क्रांती व्यापारी संघटनेने देवरूखजवळ उपकेंद्र उभारण्याची मागणी केली आहे.