78161

आचरा रामगड प्रशालेच्या
चिन्मयी शिंदेचा सत्कार

सकाळ वृत्तसेवा
आचरा, ता. १७ ः आचरा पंचक्रोशी क्रिकेट क्लबच्या माध्यमातून सुरू केलेल्या ‘सहकार्यातून सेवा’ या उपक्रमांतर्गत रामगड विद्यामंदिर, रामगड या प्रशालेची होतकरू हुशार विद्यार्थिनी चिन्मयी शिंदे हिचा विशेष सत्कार करत तिला मंडळाकडून पाच हजार रुपयांची मदत दिली. यावर्षी दहावीमध्ये ९६ टक्के गुण मिळवत तिने प्रथम क्रमांक प्राप्त केला आहे. यावेळी मुन्ना बांदिवडेकर, उमेश साटम, वैभव सावंत, तेजस घाडीगावकर आणि जयदीप कुबल आदी उपस्थित होते.
आचरा पंचक्रोशी क्रिकेट क्लब या मंडळाकडून एक संकल्पित उपक्रम बांदिवडे येथील श्रीराम उर्फ मुन्ना बांदिवडेकर यांच्या संकल्पनेमधून राबविला जात आहे. या ग्रुपमधील सदस्य महिना ५० रुपये आणि त्यापेक्षा शक्य असेल, अशी रक्कम जमा करतात. पंचक्रोशीमध्ये हुशार, होतकरू पण आर्थिक दृष्टीने कुठे तरी कमी अशा मुलांची माहिती घेऊन जमा झालेल्या निधीमधून ५ हजार एवढी मदत केली जाते. यापूर्वी त्रिंबक गावामधून जनता विद्यामंदिर त्रिंबक प्रशालेच्या प्रतीक्षा विश्वास परब तसेच आचरा पिरावाडीच्या श्री रामेश्वर विद्यामंदिर या प्रशालेमधील अपंग विद्यार्थी ओमकार सुनील पेडणेकर याला आर्थिक मदत केल्याची माहिती बांदिवडेकर यांनी दिली. एकजुट अजून घट्ट करून सर्व सदस्यांच्या सहकार्यातून हा उपक्रम यापुढेही चालू ठेवण्यात येईल, असे श्री. बांदिवडेकर यांनी सांगितले.