78275

कोकण संस्थेचे उपक्रम गरजूंना उपयुक्त

अतिरिक्त जिल्हाधिकारी शुभांगी साठे; सिंधुदुर्गनगरीत शैक्षणिक साहित्याचे वाटप

सकाळ वृत्तसेवा
ओरोस, ता. १८ ः कोकण संस्थेच्या शैक्षणिक साहित्य वाटप या उपक्रमातून अनेक विद्यार्थी शैक्षणिक प्रवाहात येण्यास मदत होईल. दिव्यांग विद्यार्थ्यांची गरज ओळखून संस्था करत असलेल्या मदतीने त्यांची वाट सुकर होईल. कोकण संस्था करत असलेले सामाजिक उपक्रम जिल्ह्यातील गरजू विद्यार्थ्यांसाठी उपयुक्त ठरत आहेत, असे प्रतिपादन अतिरिक्त जिल्हाधिकारी शुभांगी साठे यांनी केले.
कोकण कला व शिक्षण विकास संस्था, मुंबई आणि सिंधुदुर्ग साईकृपा अपंगशक्ती बहुउद्देशीय शिक्षण संस्था कसाल व भाजप दिव्यांग विकास आघाडीच्या सहयोगाने आज सिंधुदुर्गनगरी येथील वसंत स्मृती सभागृहात शैक्षणिक साहित्याचे वाटप करण्यात आले. यावेळी श्रीमती साठे बोलत होत्या. यावेळी भाजप जिल्हाध्यक्ष प्रभाकर सावंत, जिल्हा उपाध्यक्ष प्रसन्ना उर्फ बाळु देसाई, दिव्यांग आघाडीचे अनिल शिंगाडे, शामसुंदर लोट, कोकण संस्थचे प्रथमेश सावंत, कोकण संस्थेच्या गौरी आडेलकर, वैष्णवी म्हाडगूत आदी उपस्थित होते.
दिव्यांग विद्यार्थ्यांच्या शिक्षणाची वाट सुकर व्हावी. दिव्यांग असलेल्या पालकांच्या मुलांना मदतीचा हात मिळून त्यांची शाळा सुरू राहावी. ज्ञानार्जन घेऊन त्यांचे करिअर घडण्यास मदत व्हावी. यासाठी या उपक्रमाचे आयोजन केले आहे, असे प्रथमेश सावंत यांनी आपल्या प्रास्ताविकात सांगितले. सिंधुदुर्गनगरी येथे आज ५० शालेय दिव्यांग विद्यार्थ्यांना शैक्षणिक साहित्य वाटप केले. ग्रामीण भागातील गरजू विद्यार्थ्यांना शिक्षणासाठी आवश्यक शालेय साहित्य उपलब्ध करून देण्याच्या हेतूने हा उपक्रम राबवला जातो. अनेकदा आर्थिक अडचणीमुळे मुलांना पुस्तके, वह्या, पेन यांसारख्या मूलभूत गोष्टी मिळत नाहीत. त्यामुळे त्यांचा अभ्यासातला रस कमी होतो हे लक्षात घेऊन कोकण संस्था दरवर्षी हजारो विद्यार्थ्यांना मोफत शालेय किट वितरित करून त्यांना शैक्षणिकदृष्ट्या सक्षम करण्याचे कार्य करते. समीर शिर्के यांनी प्रास्ताविक केले. अनिल शिंगाडे यांनी आभार मानले.
---------------
अनेक जिल्ह्यांत साहित्य वाटप
कोकण कला व शिक्षण विकास संस्थेच्या माध्यमातून प्रत्येक शैक्षणिक वर्षात हजारो विद्यार्थ्यांना शालेय साहित्य वाटपाचे उपक्रम राबविला जातो. यावर्षीही आतापर्यंत सिंधुदुर्ग, पुणे, बीड,अहिल्याबाई नगर, ठाणे, रायगडसह अनेक जिल्ह्यात शैक्षणिक साहित्य वाटप केले आहे.