78278

कोंबड्या वाहतूक करणाऱ्यांची मुजोरी थांबवा

दोडामार्गात मागणी; समज द्या, अन्यथा गाड्या रोखू

सकाळ वृत्तसेवा
दोडामार्ग, ता. १८ ः तिलारी घाटातून चंदगड तसेच इतर भागातून ब्रॉयलर कोंबड्या वाहतूक करणाऱ्या वाहनधारकांची मुजोरी दिवसेंदिवस वाढत चालली आहे. संबंधित चालक हे बेदरकारपणे वाहतूक करत असून त्यांना वेळीच समज द्यावी; अन्यथा त्यांच्या गाड्या रोखण्यात येतील, अशा इशाऱ्याचे निवेदन तालुक्यातील तरुणांनी येथील पोलिस निरीक्षक हेमचंद्र खोपडे यांना दिले आहे.
निवेदनात म्हटले आहे की, तिलारी घाटातून होणारी ब्रॉयलर कोंबड्यांची वाहतूक करणारे चालक घाट उतरताना घाई करतात. समोरच्या गाड्यांचा जराही विचार करत नाहीत. दोन दिवसांपूर्वी रात्री असाच प्रकार घडला. याचा त्यांना जाब विचारला असता त्यांनी अरेरावी, उद्धट भाषा वापरली. हे चालक दारू पिऊन गाड्या चालवतात आणि काही अघटीत घडले की इथल्या एजंटची नावे समोर करतात. त्यामुळे त्यांची अरेरावी दिवसेंदिवस वाढत आहे. त्यामुळे जिथून गाड्या येतात ते चालक आणि पोल्ट्री मालकांना बोलावून त्यांची बैठक घेऊन त्यांना समज द्यावी. या बैठकीला आम्हा सर्वांना बोलवावे. पोलिसांनी योग्य कारवाई केली नाही तर आम्हाला दोडामार्ग येथे गाड्या रोखणे भाग पडेल, असे निवेदनात म्हटले आहे. यावेळी सुनिल बोर्डेकर, समीर रेडकर, गौतम महाले, केशव काळबेकर, ओंकार रेडकर इतर उपस्थित होते.