श्रवणदोष असणाऱ्या व्यक्तींसाठी
रविवारी मोफत मार्गदर्शन शिबिर
सकाळ वृत्तसेवा
रत्नागिरी, ता. १८ : डॉ. एल. एच. हिरानंदानी हॉस्पिटल (पवई, मुंबई) व येथील आस्था सोशल फाउंडेशनतर्फे येत्या रविवारी (ता. २०) श्रवणदोष असणाऱ्या व्यक्तींसाठी मोफत मार्गदर्शन शिबिराचे आयोजन केले आहे. यात श्रवण व वाचा दोषसंदर्भात तपासणी करण्यात येणार आहे.
जन्मतः व जन्मानंतर श्रवणदोष असणाऱ्या किंवा अस्पष्ट बोलणाऱ्या, बोलतांना अडचण येणाऱ्या अशा सर्व बालकांसाठी व त्यांच्या पालकांसाठी तसेच मोठ्या वयोगटातील व्यक्तींना मार्गदर्शन करण्यात येईल. हे शिबिर सकाळी ९ ते दुपारी ३ या वेळेत आस्था थेरपी सेंटर, परकार हॉस्पिटलसमोर, शिवाजीनगर, रत्नागिरी येथे होईल.
शिबिरात तपासणी, आवश्यक संदर्भसेवा व त्यांच्या पालकांच्या शंकांचे निरसन करण्यात येईल. या शिबिरात कान, नाक, घसातज्ञ डॉ. कश्मिरा चव्हाण व ऑडिओलॉजिस्ट प्राजक्ता भोगटे या मुलांच्या ऐकण्या व बोलण्यासंदर्भातील समस्यांबाबत मार्गदर्शन करणार आहेत. शिबिराला येताना पालकांनी मुलांचे पूर्वतपासणी रिपोर्ट सोबत आणावेत. जिल्ह्यातील ग्रामीण भागातील कोणतेही श्रवण व वाचादोष असलेले बालक उच्च दर्जाच्या आरोग्य सुविधांपासून वंचित राहू नये, लवकरात लवकर योग्य निदान होऊन बालके आवश्यक उपचारानंतर मुख्य प्रवाहात यावीत यासाठी या शिबिराचे आयोजन केले आहे.
ओएई, बेरा, पीटीए या वैयक्तीक तपासण्या अत्याधुनिक तंत्रज्ञानाच्या सहाय्याने ना नफा ना तोटा तत्त्वावर शुल्क आकारून आकारण्यात येतील, असे या प्रसंगी आस्था दिव्यांग हेल्पलाईनचे प्रमुख समन्वयक व स्पीच थेरपिस्ट संकेत चाळके यांनी सांगितले. संबंधितांनी नोंदणी करून शिबिरात सहभागी व्हावे, असे आवाहन आस्थाच्या सचिव व प्रकल्प संचालक सुरेखा पाथरे यांनी केले आहे.