rat18p11.jpg-
78303
संगमेश्वर ः करंबेळे परिसरात विद्युतवाहिन्यांवर आलेली झाडे तोडताना ग्रामस्थ.

करंबेळेवासीयांची महावितरणला मदत
झाडे तोडण्यासाठी श्रमदान; वीजपुरवठा सुरळीत ठेवण्यासाठी सफाई
सकाळ वृत्तसेवा
संगमेश्वर, ता. १८ ः महावितरण कर्मचारी पावसाळ्यामध्ये विद्युतपुरवठा सुरळीत ठेवण्यासाठी तारेवरची कसरत करत असतात. त्यांची ही मेहनत पाहून करंबेळे फौजदारवाडी तसेच सुतारवाडी व सुर्वेवाडी येथील ग्रामस्थांनी पावसाळ्यात वीजपुरवठा खंडित होऊ नये यासाठी गावातील विजेचे खांब, वीजवाहिन्यांवरील झाडे तोडण्यास ग्रामस्थांनी मदत केली. या सहकार्याबद्दल महावितरण कर्मचाऱ्यांनी त्यांचे विशेष आभार व्यक्त केले आहेत.
पावसाळा सुरू झाला की, वीजपुरवठा सुरळीत ठेवण्याचे आव्हान महावितरणच्या कर्मचाऱ्यांपुढे असते. पावसाचा पहिला आठवडा झाल्यानंतर ठिकठिकाणी झाडाच्या फांद्या विजेच्या खांबावर, वाहिन्यांवर येतात. पावसाबरोबरच वेगवान वारे वाहू लागले की, झाडे किंवा फांद्या वाहिन्यांवर पडून वीजपुरवठा खंडित होतो. अशा प्रसंगी भरपावसात महावितरणच्या कर्मचाऱ्यांना कसरत करावी लागते. पावसामध्ये त्यांची होणारी धावपळ कमी करण्यासाठी करंबेळे येथील ग्रामस्थांनी वीजवाहिन्यांवरील झाडे तोडण्याचा निर्णय घेतला. त्यासाठी करंबेळे फौजदारवाडी, सुतारवाडी व सुर्वेवाडी येथील ग्रामस्थ एकवटले होते. त्यांनी श्रमदानातून दोन दिवसांपूर्वी महावितरणच्या कर्मचाऱ्यांच्या मदतीने प्रत्यक्षात साफसफाई केली.
करंबेळे फौजदारवाडी येथील विविध ठिकाणी विद्युतवाहिनीवर आलेली झाडी ग्रामस्थांच्या विशेष मदतीने तोडण्यात आली आहे. ग्रामस्थांनी केलेल्या विशेष सहकार्याबद्दल महावितरणतर्फे जनमित्र राजेंद्र तेरवकर यांनी आभार व्यक्त केले आहेत.