78361
‘कर्करोग चिकित्सा करा, धोका टाळा’
परुळेत व्हॅन दाखल; नागरिकांचा प्रतिसाद
सकाळ वृत्तसेवा
म्हापण, ता. १८ : ग्रामीण भागात कर्करोगाचे निदान लवकर होऊन त्वरित उपचार मिळावेत, या उद्देशाने सार्वजनिक आरोग्य विभागामार्फत मोबाईल कर्करोग निदान व्हॅन जिल्ह्यात फिरत असून, गुरुवारी (ता. १७) ती परुळे आरोग्य केंद्र अंतर्गत ग्रामपंचायत परुळे बाजार येथे दाखल झाली. सकाळी ९ ते ४ या वेळेत ग्रामस्थांची चिकित्सा करण्यात आली. याला परुळे पंचक्रोशीतून उत्स्फूर्त प्रतिसाद मिळाला.
यावेळी जिल्हा आरोग्य अधिकारी डॉ. सई धुरी, माजी सभापती शिक्षण व आरोग्य नीलेश सामंत, सरपंच प्रणिती आंबडपालकर, कुशेवाडाचे सरपंच नीलेश सामंत, मेढा निवतीचे सरपंच अवधूत रेगे, केळूसचे सरपंच योगेश शेटये, परुळेचे माजी सरपंच तथा सदस्य प्रदीप प्रभू, उपसरपंच संजय दुधवडकर, सदस्य सुनाद राऊळ यांसह तालुका आरोग्य अधिकारी डॉ. स्‍त्रीरोगतज्ज्ञ डॉ. शेटकर, दंत शल्यचिकित्सक डॉ. मणेर, नर्सिंग कर्मचारी उपस्थित होते.
या मोहिमेत मुखाचा, स्तनाचा, गर्भाशयाच्‍या कर्करोगाची तपासणी करण्यात येणार आहे. निदान झालेल्या रुग्णांवर शासनामार्फत डेरवणच्या वालावलकर रुग्णालयात उपचार केले जातील. तसेच उपस्थित रुग्णांचे रक्तदाब, रक्त, शुगर, हिमोग्लोबिन तपासणी व आयुष्‍मान, आभा कार्ड काढण्यात येणार आहे. प्राथमिक आरोग्य केंद्र कार्यक्षेत्रातील नागरिकांनी याचा लाभ घ्यावा, असे आवाहन वेंगुर्ला तालुका आरोग्य अधिकारी डॉ. रवींद्र लिलके व प्राथमिक आरोग्य केंद्राच्या डॉ. अश्विनी माईनकर, डॉ. शलाका सावंत, डॉ. सागर पवार यांनी केले आहे. यावेळी ग्रामपंचायत परुळेबाजार, कुशेवाडा, म्हापण, केळूस, कोचरा, निवती-मेढा, भोगवे, चिपी येथील ग्रामस्थ उपस्थित होते. यावेळी मान्यवरांच्या हस्ते मोबाईल व्हॅन तपासणीला प्रारंभ केला.