78385

गुरुंकडून जीवनाच्या प्रवाहात आणण्याचे कार्य

अजयराज वराडकर; कट्टा हायस्कूलमध्ये गुरुपौर्णिमा, स्वरपौर्णिमा उत्साहात

सकाळ वृत्तसेवा
मालवण, ता. १८ : आज जीवनात यशस्वी होण्यासाठी प्रत्येक व्यक्ती प्रयत्न करत आहे. प्रत्येक वेळी यश मिळेलच असे नाही. अशा वेळी योग्य मार्गदर्शन देऊन जीवनाच्या प्रवाहात आणण्याचे कार्य गुरू करत असतो. गुरू हा कोणत्याही स्वरूपात असतो. त्यामुळे योगात्मा डॉ. काकासाहेब वराडकर यांनी दाखवलेल्या ज्ञानरूपी मार्गावरून जाताना यशाचे शिखर काबिज करू व हा अनमोल वारसा पुढे चालवू, असे प्रतिपादन कट्टा पंचक्रोशी शिक्षण प्रसारक मंडळाचे अध्यक्ष अजयराज वराडकर यांनी कट्टा येथे केले.
कट्टा येथील वराडकर हायस्कूल येथे गुरुपौर्णिमा व स्वरपौर्णिमा कार्यक्रमाचे आयोजन केले होते. यावेळी कट्टा पंचक्रोशी शिक्षण प्रसारक मंडळ कट्टाचे सचिव सुनील नाईक यांनी गुरु विषयाचे महत्व विषद करताना प. पू. साटम महाराज व डॉ. काकासाहेब यांचा संदर्भ दिला. यावेळी गुरू शिष्याच्या नात्याचा उलगडा करताना ज्या ज्यावेळी काकासाहेब यांना समस्या यायच्या अशा वेळी नामस्मरणाने साटम महाराज यांचा दृष्टांत होऊन समस्यांची सोडवणूक व्हायची. तसेच आध्यात्मिक गुरू म्हणून स्वामी शिवानंद यांचा काकासाहेबांच्यावरचा पगडा व पुढे जाऊन काकासाहेब यांनी केलेले सामाजिक, शैक्षणिक कार्य या विषयीची माहिती सांगून आपल्या पाठीमागे थोरा मोठ्यांचे आशीर्वाद लाभले असून यश हे आपल्या मातीत असून सुवर्णरुपी मोहरे उदयास येऊन ती तेजोमय व्हावीत, असा आशावाद व्यक्त केला.
या कार्यक्रमाचे औचित्य साधून शालेय संसदेमार्फत भक्ती गीतांचा कार्यक्रम सादर झाला. यामध्ये प्रणव पडवळ, मधुर पेंडुरकर, सोहम मेस्त्री, गणेश नांदोसकर, वेदा मराठे, पूर्वी थवी, दिया नांदोसकर, श्लोक चांदरकर, यामिनी म्हाडगुत, वेदांत फोपळे यांच्या भक्तीगीतांनी वातावरण मंत्रमुग्ध झाले. तसेच विद्यार्थ्यांनी उस्फुर्त सहभाग घेतला. संगीत साथ प्रशालेचे संगीत शिक्षक श्री. तेंडोलकर तसेच विद्यार्थी वेदांत फोपळे, आराध्य रेवंडकर, चिन्मय गोंधळी, विघ्नेश गावडे यांनी दिली. या कार्यक्रम प्रसंगी कट्टा पंचक्रोशी शिक्षण प्रसारक मंडळ कट्टाच्या सचिव श्रीमती विजयश्री देसाई, शाळा व्यवस्थापन अध्यक्ष सुधीर वराडकर, मुख्याध्यापिका देवयानी गावडे, वराडकर इंग्लिश स्कूलचे मुख्याध्यापक ऋषी नाईक, पर्यवेक्षक महेश भाट, शालेय संसद उपाधीपती किसन हडलगेकर, सहायक उपाधीपती भूषण गावडे आदी उपस्थित होते.