वाटद एमआयडीसीबाबत
आज जनआक्रोश सभा
रत्नागिरी, ता. १८ः तालुक्यातील प्रस्तावित वाटद एमआयडीसीसंदर्भात हरकतींवरील सुनावणी काही दिवसांपूर्वीच येथील उपविभागीय अधिकारी कार्यालयात घेतली होती. त्यमुळे वाटद एमआयडीसी होण्याचा मार्ग मोकळा होईल, असे वाटत असतानाच वाटद एमआयडीसीविरोधी संघर्ष कृती समिती आणि पंचक्रोशीतील ग्रामस्थांतर्फे खंडाळे येथे शनिवारी (ता. १९) सकाळी दहा वाजता सर्वोच्च न्यायालयाचे वकील आणि मानवाधिकार विश्लेषक अॅड. असीम सरोदे यांच्या उपस्थितीत जनआक्रोश सभा आयोजित केली आहे.
वाटद एमआयडीसी आणि विनाशकारी प्रकल्पाविरोधात स्थानिक एकवटले आहेत. या अनुषंगाने वैयक्तीक हरकतींवरील सुनावणी पूर्ण झाली असली तरी सामूहिक सुनावणी पुढे गेली आहे. ग्रामस्थांनी वाटद एमआयडीसीला पूर्वीपासून विरोध दर्शवला असून या पार्श्वभूमीवर वाटद एमआयडीसीविरोधी संघर्ष कृती समिती आणि पंचक्रोशीतील ग्रामस्थांच्यावतीने शनिवारी सकाळी जनआक्रोश सभा आयोजित करण्यात आली आहे. या सभेचे आयोजन वाटद एमआयडीसीविरोधी संघर्ष कृती समितीने खंडाळा पंचक्रोशी सामाजिक संस्था आणि शिवराज्य प्रतिष्ठान महाराष्ट्र यांच्या सहकार्याने आयोजित केली आहे. शिवराज्य प्रतिष्ठान प्रदेशाध्यक्ष अॅड. रोशन पाटील उपस्थित राहणार आहेत.