तीन कोटींची जमीन साडेपाच कोटींना
विनायक राऊत ः नगरपंचायत प्रशासनावर टीका
(मेन २ च्या शेजारी)
सकाळ वृत्तसेवा
लांजा ः कोत्रेवाडी येथील प्रस्तावित डंपिंग ग्राउंडची अडीच ते तीन कोटींची जमीन तब्बल साडेपाच कोटींना दिली. निम्मे पैसे मालकाला, निम्मे पैसे नेत्यांना, गद्दारांसहित सर्वांना, अशा शब्दात माजी खासदार विनायक राऊत यांनी कोत्रेवाडी येथील प्रस्तावित डंपिंग ग्राउंडमधील कथित भ्रष्टाचाराचे वाभाडे काढले.
एका कार्यक्रमानिमित्ताने माजी खासदार विनायक राऊत हे शुक्रवारी (ता.१८) लांजा येथे आले होते. या वेळी त्यांनी नगरपंचायत प्रशासन आणि संबंधित लोकप्रतिनिधी यांच्यावर टीका केली. लांजा नगरपंचायत प्रशासनाच्या जोरजबरदस्ती कारभारावर कडाडून टीका करताना माजी खासदार विनायक राऊत म्हणाले की, लांजा शहरातला कचरा दुसरीकडे टाकला पाहिजे, या गोष्टीला मी सहमत आहे; परंतु कोत्रेवाडीत हा कचरा नेऊन टाकायचा आणि तिथे काय जनावरे राहतात का? तिथे पण माणसेच राहतात ना? आता सध्या एवढे रोग येत आहेत की, त्यामुळे कोत्रेवाडी येथे कचरा टाकला तर असलेले सर्व रोग हे कोत्रेवाडीवासीयांना डसतील, असा हल्लाबोल त्यांनी नगरपंचायत प्रशासनावर केला .
---