78489

कुडाळ-वालावल बस फेऱ्या पूर्ववत करा

आय. वाय. शेख; काँग्रेसतर्फे आगारप्रमुखांना निवेदन

सकाळ वृत्तसेवा
कुडाळ, ता. १९ ः कुडाळ-वालावल मार्गावरील बंद बस फेऱ्या पुन्हा सुरू करण्याबाबतची मागणी कुडाळ आगार प्रमुखांकडे सिंधुदुर्ग जिल्हा राष्ट्रीय काँग्रेस सचिव आय. वाय. शेख यांनी केली. वालावल गाव व परिसरातील नागरिक अनेक दिवसांपासून बससेवेच्या अडचणींमुळे त्रस्त आहेत. कुडाळ आगारातून सुटणाऱ्या विविध बस फेऱ्या बंद झाल्यामुळे विद्यार्थ्यांचे शिक्षण, नोकरदारांचा प्रवास तसेच ग्रामीण भागांतील नागरिकांचे दैनंदिन जीवन समस्याग्रस्त बनल्याबाबत त्यांनी निवेदन देऊन लक्ष वेधले.
निवेदनात म्हटले आहे की, ‘कुडाळ-वालावल मार्गावरील अनेक बस फेऱ्या बंद आहेत. यामध्ये सकाळी ५.५० वाजता सुटणारी कुडाळ-वालावल-माऊली मंदिर ही बस अनेक दिवसांपासून बंद आहे. सद्यस्थितीत या मार्गावर धावणाऱ्या वस्तीतील प्रवाशांसाठी असलेल्या बसेस प्रचंड गर्दीमुळे भरून जातात. त्यामुळे विद्यार्थी तसेच कुडाळला बाजारासाठी जाणारे विक्रेते, ग्राहकांना प्रवास करणे शक्य होत नाही. हीच अडचण लक्षात घेता ही सकाळची फेरी सुरू केली होती. त्यामुळे ग्रामीण भागातील नागरिकांना कुडाळ बाजाराच्या ठिकाणी पोहोचणे शक्य होत असे. शाळा आणि महाविद्यालयात शिकणाऱ्या विद्यार्थ्यांना कुडाळ येथे किंवा तिथून पुढे जाण्यासाठी लागणारी अन्य मिळविणे या फेरीमुळे शक्य होत असे. त्यामुळे ही फेरी पुन्हा त्वरित सुरू करणे आवश्यक आहे. दुपारी साडेबाराला सुटणारी कुडाळ-वालावल-माऊली मंदिर ही फेरी वेळेवर आणि नियमितपणे चालविणे आवश्यक आहे. शाळा आणि महाविद्यालय सुटल्यानंतर विद्यार्थी या फेरीची वाट पाहत असतात. सद्यस्थितीत या फेरीची वेळ अचूक न ठेवल्यामुळे त्यांना बस मिळण्यात मोठी अडचण होते. अनेकदा उशीर झाल्यामुळे विद्यार्थ्यांना उभे राहून किंवा बसचा पास असूनही इतर पर्याय शोधावा लागतो. यामुळे शारीरिक व मानसिक नुकसान होते. त्यामुळे ही बस वेळेवर आणि प्रत्येक दिवशी नियमितपणे चालवावी. दुपारी १.१५ ची कुडाळ-वालावल-कवठी ही बस गेल्यानंतर थेट ३.२० वाजता पुढील बस उपलब्ध होते. या दरम्यान जवळपास दोन तासांपर्यंत वालावलच्या दिशेने एकही बस येत नाही. त्यामुळे शाळा-महाविद्यालय संपल्यानंतर परत येणाऱ्या विद्यार्थ्यांना वाट पाहत थांबावे लागते. त्यामुळे पूर्वीप्रमाणे दुपारी २.१५ वाजता सुटणारी कुडाळ-वालावल-माऊली मंदिर-कोरजाई ही फेरी तत्काळ सुरू करावी.’’