नॅब संस्थेतर्फे बुधवारी
शालेय साहित्य वाटप
सावंतवाडी ः नॅशनल असोसिएशन फॉर दी ब्लाईंड सिंधुदुर्ग-सावंतवाडीतर्फे दृष्टीबाधित सदस्यांच्या पाल्यांना शालेय साहित्याचे वाटप बुधवारी (ता. २३) सकाळी ११ वाजता भटवाडी सावंतवाडी येथील नॅब संस्थेच्या सभागृहामध्ये करण्यात येणार आहे. याचबरोबर गरजू लाभार्थी स्त्रीया अथवा लाभार्थ्यांची पत्नींना साड्या वाटप करण्यात येणार आहे. गोव्यातील समाजसेवी प्रेमनाथ हजारे यांनी आपल्या पत्नीच्या स्मृती प्रीत्यर्थ या साड्या नॅब संस्थेसाठी भेट दिल्या आहेत. इच्छुकांनी आपली नावे फोनद्वारे नोंदवावीत, असे आवाहन नॅबचे अध्यक्ष अनंत उचगावकर, सचिव सोमनाथ जिगजिन्नी यांनी केले आहे.
...................
हरिनाम सप्ताहाचे
माजगावात आयोजन
ओटवणे ः माजगाव येथील श्री महादेव मंदिरात ४ ऑगस्टला हरिनाम सप्ताहाचे आयोजन केले आहे. या सात प्रहरांच्या हरिनाम सप्ताहाची सांगता दुसऱ्या दिवशी होणार आहे. यानिमित्त माजगावातील भजन मंडळे आपली सेवा महादेवाचरणी अर्पण करणार आहेत. भजनाचा हा अखंड गजर दुपारपासून दुसऱ्या दिवशी सकाळपर्यंत सुरू राहणार आहे. यानिमित्त ४ ऑगस्टला सायंकाळी माजगाव येथील भाईसाहेब सावंत माध्यमिक विद्यालयाची आकर्षक चित्ररथांसह वारकरी दिंडी निघणार आहे.
..........................
कणकवलीत मंगळवारी
संत नामदेवांना वंदन
कणकवली ः येथील शिंपी समाज ऐक्यवर्धक संघातर्फे मंगळवारी (ता. २२) श्री संत शिरोमणी नामदेव महाराज समाधी सोहळा आयोजित केला आहे. या निमित्ताने संस्थेचे अध्यक्ष सुहास वरुणकर यांच्या कणकवली येथील घरी श्री संत शिरोमणी नामदेव महाराजांच्या प्रतिमेचे पूजन व विविध धार्मिक, सांस्कृतिक कार्यक्रमांचे आयोजन केले आहे. सकाळी १०.३० वाजता संत नामदेव महाराज यांच्या प्रतिमेचे पूजन, ११.३० वाजता ज्ञाती भगिनींचा भजनाचा कार्यक्रम, दुपारी १ वाजता महाप्रसाद, सायंकाळी ४.३० वाजता ज्ञाती भगिनींचे सांस्कृतिक कार्यक्रम, सायंकाळी ७ वाजता गुणगौरव, बक्षीस वितरण व सत्कार समारंभ, रात्री ८ वाजता कार्यक्रमाचा समारोप होणार आहे. ज्ञाती बांधवांनी सोहळ्यास उपस्थित राहावे, असे आवाहन केले आहे.
.......................
राज्य निबंध स्पर्धेत
प्राची दळवी प्रथम
सावंतवाडी ः शिक्षक क्लब ऑफ जालनातर्फे भारतरत्न डॉ. बाबासाहेब आंबेडकर यांच्या १३४ व्या जयंतीनिमित्त शिक्षकांसाठी राज्यस्तरीय निबंध स्पर्धा घेण्यात आली. डॉ. बाबासाहेब आंबेडकर यांच्या कार्यकर्तृत्वाच्या सहा विषयांवर निबंध लेखन करायचे होते. या स्पर्धेत सिंधुदुर्ग जिल्हास्तरावर प्रथम क्रमांकाच्या मानकरी जिल्हा परिषद प्राथमिक शाळा, माजगाव क्र. ५ च्या (ता. सावंतवाडी) शिक्षिका प्राची दळवी ठरल्या. यापूर्वीही त्यांनी अनेक स्पर्धा तसेच शैक्षणिक उपक्रमात यश प्राप्त केले आहे. हा सोहळा जेईएस महाविद्यालय जालना येथे झाला. कार्यक्रमाच्या अध्यक्षस्थानी माजी प्राचार्य तथा साहित्यिक एम. जी. जोशी होते. प्रमुख अतिथी म्हणून प्रा. गणेश अग्निहोत्री, कवयित्री भारती हेरकर, प्राचार्य अशोकराव खरात, आर. आर. जोशी, प्रा. यशवंत सोनवणे, जगदीश खुडे उपस्थित होते. कार्यक्रमाचे मुख्य संयोजक तथा समूहाचे अध्यक्ष राजेभाऊ मगर, सचिव दत्तात्रय राऊतवाड, श्री. इंगोले यांनी उत्कृष्ट नियोजन केले.