भजनी कलाकार संस्थेतर्फे
आज मसुरे येथे कार्यशाळा

सकाळ वृत्तसेवा
मसुरे, ता. १९ ः मालवण तालुक्यातील सर्व संगीत, वारकरी भजनी बुवा, पखवाज वादक, तबलावादक, झांज वादक, कीर्तनकार, कोरस, नवोदित कलाकार, अन्य भजनी क्षेत्रातील कलाकारांच्या स्थापन झालेल्या ‘भजनी कलाकार संस्था सिंधुदुर्ग’ला शासन दरबारी मान्यता मिळाली आहे. या संस्थेतर्फे
तालुकास्तरीय कार्यशाळा उद्या (ता. २०) सकाळी ९ वाजता मसुरे येथील भरतगड इंग्लिश मीडियम स्कूलच्या सभागृहात संतोष कानडे यांच्या अध्यक्षतेखाली आयोजित केली आहे.
संस्थेचे कार्यकारी मंडळ व या क्षेत्रातील मान्यवरांच्या उपस्थितीत विविध विषयांवर चर्चा विचारविनिमय करण्यात येणार आहे. यावेळी मसुरे येथील प्रसिद्ध उद्योजक तथा महाराष्ट्र चेंबर ऑफ कॉमर्सचे उपाध्यक्ष डॉ. दीपक मुळीक परब, मुंबई येथील प्रसिद्ध उद्योजक तथा ज्येष्ठ कामगार नेते प्रकाश परब, भजन सम्राट तथा मानधन समिती सिंधुदुर्गचे सदस्य भालचंद्र केळुसकर, माजी सभामती तथा मानधन समिती सिंधुदुर्गचे सदस्य अजिंक्य पाताडे प्रमुख अतिथी म्हणून उपस्थित राहणार आहेत. यावेळी कलाकार मानधन विमा योजना, कलाकार ओळखपत्र, भजन परंपरा संवर्धन व जतन, भजन कार्यशाळा मार्गदर्शन शिबिर, कलाकारांसाठी असलेल्या शासकीय योजनांबाबत शासन पाठपुरावा करणे, नवीन सदस्य नोंदणी, ज्येष्ठ कलाकारांना मार्गदर्शन अशा विविध प्रश्नांसंदर्भात नियोजन करण्यासाठी सर्व संबंधितांनी उपस्थित राहावे, असे आवाहन भजनी कलाकार संस्थेचे अध्यक्ष संतोष कानडे आदींनी केले आहे.