विजेचा धक्का बसून दोघांचा मृत्यू
निवळीतील घटना ; एका महिलेचा समावेश
सकाळ वृत्तसेवा
रत्नागिरी, ता. १९ ः तालुक्यातील निवळी- शिंदेवाडी येथील जंगलात विजेच्या वाहिनीचा धक्का लागून एका महिलेसह दोघांचा जागीच मृत्यू झाला. या घटनेमुळे महावितरणच्या कार्यप्रणालीवर प्रश्नचिन्ह निर्माण झाले आहे.
मृदुला वासुदेव वाडकर (वय ६१, रा. निवळी कुंभळ वठार, रत्नागिरी ), चंद्रकांत यशवंत तांबे (वय ४३, रा. निवळी-शिंदेवाडी, रत्नागिरी) अशी मृतांची नावे आहेत. ही घटना सायंकाळी साडेसहाच्या सुमारास निदर्शनास आली. मिळालेल्या माहितीनुसार, मृदुला वाडकर या निवळी शिंदेवाडीत एकट्याच राहात होत्या. दोन दिवसापूर्वी त्यांच्या घरातील वीजपुरवठा खंडित झाला होता. ज्यांची माहिती त्यांनी महावितरण कंपनीच्या वायरमनला दिली होती. वायरमनने महिलेच्या घराभोवती असलेल्या झाडीमुळे दुरुस्ती करण्यास असमर्थता दर्शवली आणि झाडी कापून घेतल्यास दुरुस्तीला येण्याचे सांगितले. त्यानुसार वाडकर यांनी घराभोवतीची झाडी कापून घेण्यासाठी चंद्रकांत तांबे यांना बोलावले. गुरूवारी दिवसभरात हे काम सुरू असताना विद्युतभारित वीजवाहिनीला दोघांचा हात लागला असावा आणि त्यांना विजेचा जोरदार धक्का बसला असल्याचा अंदाज व्यक्त करण्यात आला आहे. या घटनेत त्यांचा जागीच मृत्यू झाला.
घटनेची माहिती मिळतास पोलिस पाटील आणि ग्रामीण पोलिस ठाण्याचे पोलिस निरीक्षक राजेंद्र यादव यांनी तातडीने घटनास्थळी धाव घेतली. या घटनेमुळे परिसरात हळहळ व्यक्त होत असून, महावितरणच्या वायरमनने वेळेवर आणि योग्य उपाययोजना न केल्याने हे दोन निष्पाप बळी गेल्याचा आरोप स्थानिक ग्रामस्थांकडून करण्यात येत आहे. या प्रकरणी सखोल चौकशी करून दोषींवर कठोर कारवाई करण्याची मागणी केली जात आहे. अधिक तपास सुरू असल्याचे पोलिसांनी सांगितले.