78737

दिव्यांग विद्यार्थिनीसाठी
सर्व तासिका एकाच वर्गात

राऊळ महाविद्यालय; आरोग्य सेवाही

सकाळ वृत्तसेवा
कुडाळ, ता. २० ः चालू शैक्षणिक वर्षामध्ये संत राऊळ महाराज महाविद्यालयाच्या एका विद्यार्थिनीसाठी पूर्ण वर्गाच्या सर्व तासिका तळमजल्यावर सुरू केल्या आहेत. दिव्यांग असल्यामुळे तिला मजले चढता येत नाहीत. त्यामुळे अध्ययनात कोणतीही अडचण येऊ नये, किंबहुना वरच्या मजल्यावर असणाऱ्या तासिका चुकू नयेत, यासाठी महाविद्यालयाने ही व्यवस्था केल्याचे संबंधित प्रशासनाने सांगितले.
माजी विद्यार्थी, उद्योजक अजित राणे यांनी दिव्यांग विद्यार्थ्यांसाठी व्हीलचेअर दिली आहे. प्राध्यापक व प्राध्यापकेतर कर्मचाऱ्यांकरिता राणे यांचे बंधू डॉ. जी. टी. राणे यांच्या आरोग्य सेवेचाही लाभ देण्यात येणार आहे. महाविद्यालय व राणे हॉस्पिटल अँड मेडिकल रिसर्च सेंटरमध्ये तसा सामंजस्य करार नुकताच करण्यात आला. त्याचा लाभ विद्यार्थी, प्राध्यापक व अन्य कर्मचाऱ्यांना होणार आहे. उद्योजक राणे यांनी महाविद्यालयास सदिच्छा भेट देत जुन्या आठवणींना उजाळा दिला. यावेळी कराची महाराष्ट्र शिक्षण प्रसारक मंडळाचे सहकार्यवाह महेंद्र गवस, निवृत्त सनदी अधिकारी सुहास पाटील आणि मधुसुदन मर्तल, प्राचार्य डॉ. स्मिता सुरवसे, प्रा. डॉ. अनंत लोखंडे, प्रा. प्रशांत केरवडेकर उपस्थित होते.