- rat२१p५.jpg -
२५N७८९१३
देवरुख ः येथील जिल्हा परिषद कर्मचाऱ्यांची निवास इमारत वापराविनाच आहे. तिथे वाहने उभी करून ठेवली जातात.

देवरूखमधील कर्मचाऱ्यांची इमारत वापराविना
लाखोंचा खर्च ; प्रशासनाचे दुर्लक्ष, उंदीर, साप, घुशींचा वावर वाढला
सकाळ वृत्तसेवा
संगमेश्वर, ता. २१ ः देवरूख शहरातील जिल्हा परिषद कर्मचाऱ्यांसाठी बांधलेल्या निवासस्थानावर लाखो रुपये खर्च करून दुरुस्ती करण्यात आली; मात्र, त्या इमारतींमध्ये आजतागायत एकही कर्मचारी वास्तव्यास आलेला नाही. सध्या या इमारती वापराविनाच आहेत.
देवरूखमधील कर्मचाऱ्यांच्या निवासस्थानांची २०१९ मध्ये छप्पर दुरुस्ती आणि इतर कामे करण्यात आली होती. त्यासाठी सुमारे २ लाख ७६ हजार ९४१ रुपयांचा खर्च करण्यात आला; मात्र या निवासस्थानात कर्मचारी राहण्यास उत्सुक नाहीत. देवरूख ग्रामीण रुग्णालयाची नवीन इमारत बांधण्याचे काम हाती घेताना जवळपास दोन वर्षे याच कर्मचाऱ्यांच्या निवासस्थानातून रुग्णालयाचा कारभार सुरू होता. रुग्णालयाची नवी इमारत एक वर्षांपूर्वी वापरात आल्यामुळे रुग्णालय स्थलांतरित करण्यात आले; मात्र, आजही त्या जुन्या इमारतीवर रुग्णालयाचे लहान लहान फलक तसेच आहेत. सध्या या इमारतीकडे प्रशासनाचे दुर्लक्ष झालेले आहे. त्यामुळे उंदीर, साप, घुशी यांचा वावर वाढला असून, परिसर अस्वच्छ झालेला आहे. कर्मचाऱ्यांनी गजबजलेली ही इमारती पडीक बनली आहे. कर्मचारी वास्तव्यास येणार नसतील तर त्यांची देखभाल-दुरूस्ती का केली जाते, असा प्रश्न संगमेश्वरवासियांमधून व्यक्त केला जात आहे.
---
अन्य विभासाठी वापर करा
लाखोंचा खर्च करूनही कर्मचाऱ्यांची इमारत वापराविना पडून राहत असेल तर हे अत्यंत चुकीचे आहे. प्रशासनाने यामध्ये तातडीने लक्ष घालून या इमारतीचा इतर विभागासाठी वापर करावा अशी मागणी परिसरातील नागरिकांतून होत आहे.