79241

परिश्रमातून यश हीच खरी ओळख

अमोल वारघडे; कणकवलीत शिष्यवृत्ती मार्गदर्शन वर्ग

सकाळ वृत्तसेवा
कणकवली, ता.२२ ः वेळेचे योग्य नियोजन करून विद्यार्थ्यांनी सातत्यपूर्ण अभ्यास केल्यास यश दूर नाही. परिश्रमातून मिळवलेले यशच तुमची खरी ओळख बनते, असे प्रतिपादन सहाय्यक धर्मादाय आयुक्त कार्यालय, सिंधुदुर्गचे अधीक्षक अमोल वारघडे यांनी केले.
कणकवलीतील परमहंस भालचंद्र महाराज शैक्षणिक मंडळाच्या शिष्यवृत्ती मार्गदर्शन वर्गाचा शुभारंभ संस्थानचे अध्यक्ष सुरेश कामत यांच्या अध्यक्षतेखाली आणि सहाय्यक धर्मादाय आयुक्त कार्यालयाचे अधीक्षक अमोल वारघडे यांच्या प्रमुख उपस्थितीत झाला. यावेळी संस्थानचे खजिनदार दादा नार्वेकर, सेक्रेटरी निवृत्ती धडाम, विश्वस्त प्रसाद अंधारी, गजानन उपरकर, काशिनाथ कसालकर, नागेश मुसळे, संस्थानचे व्यवस्थापक विजय केळूसकर, प्रा. दिवाकर मुरकर, शैक्षणिक सल्लागार शरद हिंदळेकर व शैक्षणिक मंडळाचे सदस्य उपस्थित होते.
सुरेश कामत म्‍हणाले, ४० वर्षांपासून सातत्याने संस्थानचे शिष्यवृत्ती परीक्षा मार्गदर्शन वर्ग सुरू आहेत. गजानन उपरकर यांनी मंडळाच्या कार्याचा आढावा घेऊन तपशिलवार नियोजन सादर केले. यावेळी सरीता पवार, रामचंद्र डोईफोडे यांनी मनोगत व्यक्त केले. निवृत्ती धडाम, विजय केळूसकर, दिवाकर मुरकर यांनीही मार्गदर्शन केले. सुहास आरोलकर यांनी सूत्रसंचालन केले. सदानंद गावकर यांनी प्रास्ताविक केले. विष्णू सुतार यांनी आभार मानले.