लाच प्रकरणातील अटक
तलाठ्याला सशर्त जामीन

सकाळ वृत्तसेवा
मालवण, ता. २२ : वारस तपासासाठी चार हजार रुपयांची लाच स्वीकारताना रंगेहाथ पकडलेल्या तलाठी नीलेश दुधाळ याला आज ५० हजार रुपयांचा सशर्त जामीन जिल्हा विशेष न्यायाधीश जे. पी. झपाटे यांनी मंजूर केला.
मसुरे येथील दोन ग्रामस्थांनी वारस तपासासाठी तलाठी कार्यालयाकडे अर्ज केला होता. यात प्रत्येक अर्जाच्या वारस तपासासाठी दोन हजार, असे एकूण चार हजार रुपये द्यावे लागतील, असे तलाठी दुधाळ याने तक्रारदाराला सांगितले होते. तक्रारदाराने याबाबतची तक्रार कुडाळ येथील लाचलुचपत प्रतिबंधक विभागाकडे केली होती. त्यानुसार चार दिवसांपूर्वी लाच लुचपत प्रतिबंधक विभागाच्या पथकाने सापळा रचत तलाठी दुधाळ याला रंगेहाथ पकडले होते. त्याने जामिनासाठी अर्ज केला होता. यावरील सुनावणी आज जिल्हा विशेष न्यायाधीश झपाटे यांच्यासमोर झाली. यात संशयिताला ५० हजार रुपयांचा सशर्त जामीन मंजूर करण्यात आला. दोषारोप पत्र दाखल होईपर्यंत प्रत्येक सोमवार व गुरुवार या दिवशी कुडाळ येथील लाचलुचपत प्रतिबंधक विभागाच्या कार्यालयात हजेरी लावण्याची अट घालण्यात आली आहे. ॲड. अजित भणगे, ॲड. मिहीर भणगे, ॲड. तेजाली भणगे, ॲड. आशुतोष कुलकर्णी, ॲड. समीर मालवणकर, ॲड. स्वप्ना सामंत, ॲड. कौस्तुभ गावडे यांनी संशयिताच्या वतीने काम पाहिले.