79426

‘आंबोली–चौकुळ’मधील विद्यार्थ्यांना
गावडेंकडून स्टील थर्मस बॉटल्स
सकाळ वृत्तसेवा
सावंतवाडी, ता. २३ः सामाजिक कार्यकर्ते दिनेश गावडे यांनी वाढदिनानिमित्त आंबोली–चौकुळ जिल्हा परिषद मतदारसंघातील शाळेतील विद्यार्थ्यांना स्टीलच्या थर्मस बॉटल्सचे वाटप केले.
श्री. गावडे दरवर्षी आपला वाढदिवस विविध समाजोपयोगी उपक्रमांनी साजरा करतात. गेली दहा वर्षे ते आंबोली–चौकुळ जिल्हा परिषद मतदारसंघातील प्रत्येक गावातील शाळांमध्ये शैक्षणिक साहित्याचे वितरण करून विद्यार्थ्यांच्या उज्ज्वल भविष्यासाठी सातत्याने योगदान देत आहेत. यामध्ये आरोग्य मदत, शैक्षणिक साहित्य वाटप आणि गरजू महिलांना मदत अशा विविध उपक्रमांचा समावेश असतो. त्यांनी यंदाही चौकुळ, आंबोली, केसरी, दाणोली, सातोळी, बावळट, विलवडे आणि भालावल यांसारख्या विविध गावांतील शाळांमधील विद्यार्थ्यांना स्टीलच्या थर्मस बॉटल्सचे वाटप करण्यात आले. यावेळी माजी मुख्याध्यापक भरत गावडेंसह इतर मान्यवर व गावडे मित्रमंडळाचे सदस्य उपस्थित होते.