राजीवड्यातील ‘बांगलादेश’ नोंद काढा
उदय सामंत ः मुख्याधिकारी, जिल्हाधिकाऱ्यांना आदेश
सकाळ वृत्तसेवा
रत्नागिरी, ता. २४ : शहरातील बांगलादेश हे नाव रत्नागिरी पालिकेच्या नोंदणीतून काढून टाकण्यात यावे. तसेच या ठिकाणाला श्री देव विश्वेश्वर मंदिर मार्ग असे नामकरण करावे, असे आदेश पालकमंत्री उदय सामंत यांनी रत्नागिरी मुख्याधिकारी आणि जिल्हाधिकारी यांना दिले आहेत.
शिवसेनेच्या पदाधिकाऱ्यांनी गेल्या मंगळवारी मुख्याधिकारी यांची भेट घेऊन बांगलादेश नाव बदलण्याची मागणी केली होती. याबाबत पालकमंत्री सामंत यांनी शिवसेना पदाधिकाऱ्यांचे कौतुक केले. रत्नागिरी शहराच्या नोंदणीमधून बांगलादेश हे नाव काढून टाकण्याचा निर्णय पालकमंत्री म्हणून घेतला आहे. तसे आदेश मी जिल्हाधिकाऱ्यांना आणि मुख्याधिकाऱ्यांना दिले आहेत. हा मार्ग श्रीदेव विश्वेश्वर मंदिर मार्ग अशा पद्धतीचे नामकरण करावे, अशा देखील मी सूचना केल्याचे सामंत यांनी सांगितले. शेवटी राजीवडा आणि श्री विश्वेश्वर मंदिर यांच्या मधल्या भागामध्ये जी वस्ती आहे त्याला बांगलादेश या नावाने संबोधले जायचे. हे आपल्या देशाच्या, महाराष्ट्राच्या, जिल्ह्याच्या आणि रत्नागिरीच्यादृष्टीने अयोग्य असल्याने आम्ही हा निर्णय घेतल्याचे पालकमंत्री सामंत यांनी सांगितले.