ई-केवायसीसाठी गुरुवारपर्यंत मुदत
पुरवठा विभाग ; शिधापत्रिकाधारकांना संधी
सकाळ वृत्तसेवा
रत्नागिरी, ता. २५ ः रत्नागिरी जिल्ह्यासह राज्यभरात रास्त दराच्या धान्य दुकानातील शिधापत्रिकाधारकांना ई-केवायसी करणे आवश्यक आहे. ज्या लाभार्थ्यांनी अद्याप ई-केवायसी केलेली नाही त्यांनी ३१ जुलैपर्यंत ई-केवायसी पूर्ण करावी अन्यथा शिधापत्रिकेवरील धान्य बंद होईल, असे प्रशासनाकडून सांगण्यात आले.
रत्नागिरी जिल्ह्यात ई-केवायसीचे काम सुरू आहे. त्यासाठी मुदतवाढही देण्यात आली होती. अद्याप काही ग्राहकांनी ई-केवायसी पूर्ण केलेली नाही. सध्या रत्नागिरी जिल्ह्यात २ लाख ८५ हजार ७९५ रेशनकार्ड धारक ई-केवायसीविना आहेत, असे पुरवठा विभागाने म्हटले आहे. त्यामुळे शिधापत्रिकाधारकांनी जुलै अखेरपर्यंत सार्वजनिक वितरण प्रणाली, विविध रेशनदुकानात किंवा घरातून ऑनलाईन प्रणाली वापरून आपली ई-केवायसी पूर्ण करावी अन्यथा रेशनदुकानातून मिळणारे धान्य मिळणार नाही, असा इशारा पुरवठा विभागाच्यावतीने संबंधित शिधापत्रिकाधारकांना देण्यात आला आहे. जिल्ह्यात ४ लाख ९४ हजार ६६६ जणांच्या ई-केवायसीला मान्यता देण्यात आली आहे तसेच २० हजार ९४७ जणांची केवायसी रद्द केली गेली आहे तर ३ लाख ५० हजार ७९५ जणांच्या ई-केवायसी मंजुरीच्या प्रतीक्षेत आहे. अद्याप २ लाख ८५ हजार ७९५ शिधापत्रिकाधारकांनी ई-केवायसी पूर्ण केली नाही त्यांनी ई-केवायसी करून घ्यावी, असे आवाहन करण्यात आले आहे.