ratchl२५१.jpg-
79876
चिपळूण ः नागपंचमीसाठी मातीचे नाग तयार करताना दिव्यांग विद्यार्थी.
-----------------
दिव्यांगांनी साकारले मातीचे नाग
नागपंचमीनिमित्त जिद्द शाळेत उपक्रम; विक्रीसाठी उपलब्ध
सकाळ वृत्तसेवा
चिपळूण, ता. २५ ः कोवॅस संचलित जयदीप मोने उद्योगकेंद्र आणि जिद्द मतिमंद मुलांची शाळा येथील दिव्यांग विद्यार्थ्यांनी नागपंचमीसाठी मातीचे नाग तयार केले असून, हे नाग विक्रीसाठी विविध ठिकाणी उपलब्ध केले आहेत. २९ जुलैला नागपंचमी साजरी होणार असल्याने विद्यार्थ्यांनी विशेष मेहनत घेऊन ही पारंपरिक प्रतिकृती साकारली आहे.
दरवर्षीप्रमाणे यंदाही या शाळेतील विद्यार्थी विविध वस्तू तयार करतात. त्यामध्ये फिनेल, लिक्विड सोप, हँडवॉश, डिशवॉश, ऑफिस फाईल्स, शुभेच्छा कार्डस्‌, कागदी फुले, बुके, रांगोळी, उटणे, अगरबत्ती, कापूसवात, आकाशकंदील, मातीच्या पणत्या, राख्या, तिळाचे लाडू, सजावटीच्या वस्तू आणि यंदाचे वैशिष्ट्य ठरलेले मातीचे नाग यांचा समावेश आहे. नागपंचमीनिमित्ताने हे मातीचे नाग अत्यंत स्वस्त दरात विक्रीस उपलब्ध असून, नागरिकांनी ही उत्पादने खरेदी करून विद्यार्थ्यांना आर्थिक पाठबळ द्यावे, असे आवाहन उद्योगकेंद्राचे व्यवस्थापक प्रशांत कोतळुककर आणि शाळेचे मुख्याध्यापक सुनील शिंदे यांनी केले आहे.
हे सर्व मातीचे नाग कोवॅस बिल्डिंग, बहादूरशेख नाका येथील शाळेत विद्यार्थ्यांनी तयार केले आहेत. ही उत्पादने चिपळूण शहरातील श्रीराम किराणा स्टोअर्स (काविळतळी), खरे किराणा स्टोअर्स (रावतळे), चितळे किराणा दुकान (गुरूकुलमागे), रेडिज (प्रांत ऑफिससमोर), शिवदे-दिलखुश चनाभट्टी, चिपळूण बाजार, जिव्हाळा बाजार, महिला मंडळ वडनाका आदी ठिकाणी विक्रीसाठी ठेवले आहेत.