79880

लोटिस्माकडून गौरव होणे अभिमानाचे
मुख्याधिकारी विशाल भोसले ; सफाई कर्मचाऱ्यांचाही सन्मान
सकाळ वृत्तसेवा
चिपळूण, ता. २५ः चिपळूणची मातीच सकस आणि कसदार आहे. मी केवळ निमित्तमात्र आहे. ‘लोटिस्मा’ संस्था कोकणभूमीची मानसिक, बौद्धिक आणि कलात्मक साफसफाई करण्याचे महत्त्वाचे कार्य करते आहे. अशा संस्थेने पालिकेचा गौरव केला, ही बाब आमच्यासाठी अभिमानाची असून जबाबदारी वाढवणारी आहे. यापुढेही चिपळूण नगर पालिकेकडून ‘लोटिस्मा’ला सर्वतोपरी सहकार्य केले जाईल, असे प्रतिपादन मुख्याधिकारी विशाल भोसले यांनी केले.
‘लोटिस्मा’ संस्थेतर्फे आयोजित गौरव समारंभात चिपळूण नगरपालिकेचा विशेष सन्मान करण्यात आला. स्वच्छ भारत अभियानांतर्गत झालेल्या स्वच्छ सर्वेक्षण २०२४ मध्ये चिपळूण नगरपालिकेला राज्यात १४ वा आणि देशात ८७ वा क्रमांक प्राप्त झाल्याबद्दल हा गौरव करण्यात आला. लोकमान्य टिळक स्मारक वाचनमंदिराच्या बाळशास्त्री जांभेकर सभागृहात झालेल्या या कार्यक्रमात सफाई कर्मचारी आणि मुख्याधिकारी यांचा सन्मान करण्यात आला. कार्यक्रमाच्या प्रारंभी फावडा, घमेलं आणि खराटासारख्या स्वच्छतेच्या प्रतिकात्मक उपकरणांचे पूजन करण्यात आले. कार्यक्रमाचे प्रमुख पाहुणे घरडा केमिकल्स लोटेचे साईट हेड आर. सी. कुलकर्णी यांच्या हस्ते मुख्याधिकारी भोसले आणि सफाई कर्मचाऱ्यांना सन्मानपत्र देऊन गौरवण्यात आले.
कर्मचाऱ्यांच्यावतीने आरोग्य निरीक्षक सुजित जाधव यांनी लोटिस्मा संस्थेचे आभार मानले. या वेळी प्रशासकीय अधिकारी मंगेश पेढांबकर, आरोग्य विभागप्रमुख वैभव निवाते, वाचनालय अध्यक्ष डॉ. यतीन जाधव आदी उपस्थित होते. बांधकाम व्यावसायिक प्रशांत पाटेकर म्हणाले, अशा उपक्रमाचे साक्षीदार होणे हे भाग्य आहे. याच कार्यक्रमात डॉ. बाबासाहेब आंबेडकर वाचनालय, अपरांत हॉस्पिटल, रोहिदास समाजसेवा संघ, सॅटर्डे क्लब ग्लोबल ट्रस्ट या संस्थांकडूनही मुख्याधिकारी व नगरपालिकेचा सन्मान करण्यात आला. कार्यक्रमाला प्रकाश देशपांडे, बापू साडविलकर, राष्ट्रपाल सावंत, सुनील खेडेकर, समीर जानवलकर, सुरेश चिपळूणकर, अरूण इंगवले उपस्थित होते.