79925

‘मुख्यमंत्री सहायता निधी’चा लाभ घ्या

सुनील कुंडगीर ः वेंगुर्लेत माहिती पत्रकाचे वाटप

सकाळ वृत्तसेवा
वेंगुर्ले, ता. २५ ः आर्थिकदृष्ट्या गरजू रुग्णांना तातडीच्या व अत्यावश्यक आजारांवर उपचार मिळण्याकरिता मुख्यमंत्री देवेंद्र फडणवीस यांच्या संकल्पनेतून आणि राज्यस्तरीय कक्ष प्रमुख रामेश्वर नाईक यांच्या देखरेखीत ‘मुख्यमंत्री सहायता निधी कक्ष’ जिल्हास्तरावर सुरू केला आहे. या योजनेंतर्गत लाभ देण्यात येणाऱ्या आजारांची यादींबाबतच्या माहिती पत्रकांचे येथे वाटप करण्यात आले.
समाजातील गरीब व गरजू रुग्णांना दर्जेदार आरोग्य सुविधा उपलब्ध करून देणे, धर्मादाय रुग्णालयाअंतर्गत मोफत उपचार करून देणे, महात्मा फुले जन आरोग्य योजना, आयुष्मान भारत योजनेसह इतर योजनांची माहिती व सुविधा रुग्णांना मिळवून देणे तसेच योजनेच्या बाहेर असलेल्या रुग्णांना मुख्यमंत्री सहायता निधी अंतर्गत मदत पुरविणे हे या कक्षाचे प्रमुख उद्दिष्ट असल्याचे सिंधुदुर्ग जिल्ह्याच्या कक्षाचे सुनील कुंडगीर यांनी सांगितले. तसेच या कक्षाद्वारे जिल्ह्यातील आर्थिकदृष्ट्या दुर्बल घटकांना दुर्धर आजारांवर उपचार करण्यासाठी अर्थसहाय्य पुरविले जाते. पूर, दुष्काळ, आगीमुळे होणारे अपघात, मोठ्या नैसर्गिक आपत्तींमुळे बाधित नागरिकांना मुख्यमंत्री सहायता निधीमार्फत अर्थसाहाय्य पुरविले जाते, असे मार्गदर्शन केले.
यावेळी मुख्यमंत्री सहायता निधीसाठी अर्ज करतेवेळी लागणारी कागदपत्रे तसेच या योजनेंतर्गत लाभ देण्यात येणाऱ्या आजारांची यादी बाबतची माहिती पत्रकांचे वाटप करण्यात आले. यावेळी जिल्हा बँक अध्यक्ष मनीष दळवी, भाजप जिल्हा उपाध्यक्ष प्रसन्ना देसाई, तालुकाध्यक्ष पपु परब, माजी तालुकाध्यक्ष सुहास गवंडळकर, जिल्हा निमंत्रित साईप्रसाद नाईक, शिरोडा ग्रामपंचायत सदस्य मयूरेश शिरोडकर, अणसूर सरपंच सत्यविजय गावडे, युवा मोर्चाचे राहुल गावडे आदी उपस्थित होते.