79958

प्रभावीपणे योजना राबवा,
परदेश दौरे कसले करता?

परुळेकरांची केसरकरांवर टीका

सकाळ वृत्तसेवा
सावंतवाडी, ता. २५ : येथील विधानसभा मतदारसंघाचे विद्यमान आमदार दीपक केसरकर यांच्या रत्नसिंधू योजनेंतर्गत सिंगापूर, मलेशिया आणि इंडोनेशिया देशांच्या दहा दिवसांच्या पर्यटन आणि फळप्रक्रिया उद्योग विकास अभ्यास दौऱ्यावर जिल्ह्यातून आश्चर्य आणि प्रश्नचिन्ह व्यक्त होत आहे. ज्या आमदारांनी याच मतदारसंघातून तीन वेळा आमदारकी भूषविली आहे. त्यांना सिंधुदुर्गच्या पर्यटन आणि फळप्रक्रिया उद्योगाच्या विकासासाठी परदेशात जाण्याची खरंच गरज आहे का? असा प्रश्न डॉ. जयेंद्र परुळेकर यांनी उपस्थित केला आहे.
डॉ. परुळेकर यांनी पत्रकात म्हटले आहे की, महाराष्ट्र राज्य सरकारच्या पर्यटन विभागाच्या अनेक योजना प्रभावीपणे राबवल्या तरी सिंधुदुर्ग जिल्ह्यात पर्यटनाची गंगा वाहू शकते. आंबोलीसह जिल्ह्यातील अनेक बंद अवस्थेतील पर्यटन प्रकल्प पुन्हा सुरू केल्यास मोठा पर्यटन विकास साधता येईल. सरकारी पैशांवर होणारे परदेश अभ्यास दौरे अनेकदा वैयक्तिक पर्यटन दौरेच ठरतात, हे यापूर्वी अनेकदा सिद्ध झाले आहे, असेही परुळेकर यांनी निदर्शनास आणून दिले.
निवडणुकीच्या तोंडावर युवकांना जर्मनीत नोकरीचे आमिष दाखवून जर्मन भाषेच्या शिकवण्या सुरू करून फसवणूक करण्याचे प्रकार घडत असल्याचा आरोपही डॉ. परुळेकर यांनी केला आहे. अशा प्रकारच्या गोष्टींमुळे येथील पर्यटन विकासाला किंवा फळप्रक्रिया उद्योगाच्या वाढीला चालना मिळणे कठीण असल्याचे त्यांनी म्हटले आहे.
---
जिल्ह्यात ‘हे’ करणे आवश्‍यक!
जिल्ह्यातील होम स्टे योजनांना प्रोत्साहन, लहान-मोठ्या हॉटेल्सना आधुनिक सुविधा उपलब्ध करून देणे, आणि पर्यटन संबंधित विविध नावीन्यपूर्ण कल्पना राबविल्यास सिंधुदुर्ग जिल्ह्याचे पर्यटन जागतिक नकाशावर झळकू शकते, असे मत डॉ. परुळेकर यांनी व्यक्त केले.