rat25p17.jpg-
79869
दापोलीः हर्णै येथील फत्तेगडावरील घराशेजारी संरक्षक भिंत कोसळली.
-rat25p39.jpg-
79967
दापोली ः फॅमिली माळ येथील घराशेजारील भिंत कोसळून नुकसान झाले आहे.
--------
फत्तेगडावरील भिंत कोसळून दोन घरांचे नुकसान
अतिवृष्टीमुळे १० जणांचे स्थलांतर ; संरक्षक भिंत उभारण्याची मागणी
सकाळ वृत्तसेवा
दापोली, ता. २५ः गेले चार दिवस सुरू असलेल्या अतिवृष्टीमुळे तालुक्यातील हर्णै फत्तेगड किल्ल्यावरील पेडेकर यांच्या घराच्या मागील संरक्षक भिंत आणि किल्ल्याची तटबंदी कोसळल्यामुळे दोन घरांचे मिळून ३ लाख ६० हजारांचे नुकसान झाले आहे. त्या घरातील १० जणांना तातडीने जवळच्या नातेवाईकांकडे स्थलांतरित केले आहे, अशी माहिती हर्णै सजेचे तलाठी अक्षय पाटील यांनी दिली.
ऑगस्ट २०२० मध्ये या भिंतीचा काही भाग कोसळला होता. त्या वेळी तहसीलदार, ग्रामपंचायत यांना कळवले होते; परंतु अद्याप या भिंतींच्या बांधकामसंबंधी कोणतीही कार्यवाही झालेली नाही. फत्तेगड येथे मारूती कृष्णा पेडेकर व लक्ष्मण पेडेकर यांचे घर आहे. यांच्या घराच्या मागील बाजूची फत्तेगड किल्ल्याची भिंत आणि या भिंतीला लागूनच सिमेंटचा बांधलेला बंधारा गुरुवारी (ता. २४) सकाळी कोसळला. त्यामुळे लक्ष्मण पेडेकर आणि मारूती पेडेकर यांच्या घरांचे ३ लाख ६० हजाराचे नुकसान झाले आहे. यामुळे लक्ष्मण यांच्या घरातील ४ आणि मारूती यांच्या घरातील ६ जणांना तातडीने त्यांच्या फत्तेगडावरीलच नातेवाईकांकडे तात्पुरते स्थलांतरित करण्यात आले आहे. भविष्यात या दोघांच्याही घरांना मोठा धोका होण्याची दाट शक्यता आहे.

चौकट
२०२० मध्येही कोसळली होती भिंत
ऑगस्ट २०२० मध्ये फत्तेगडावर भिंत कोसळून पेडेकर यांच्या घराच्या इमारतीला धक्का बसला होता. त्या घराला तडादेखील गेला होता. त्या वेळी तहसीलदार व ग्रामपंचायतीला ग्रामस्थांनी निवेदन देऊन उपाययोजना करण्याची मागणी केली होती. त्यानंतर तलाठी व ग्रामपंचायत कर्मचाऱ्यांनी येऊन फक्त पाहणी केली. पुढे काहीच कार्यवाही झालेली नाही. त्यामुळे पाच वर्षानंतर पुन्हा गडावरील भिंत कोसळल्याचे ग्रामस्थांनी सांगितले.

चौकट
दापोलीत घराशेजारील भिंत कोसळली
दापोली शहरातील फॅमिली माळ परिसरात कोंडविलकर यांच्या घराशेजारील संरक्षक भिंत कोसळली. यामुळे कोंडविलकर यांच्या घराला धोका निर्माण झाला आहे. सुदैवाने या घटनेत कोणालाही दुखापत झालेली नाही. शुक्रवारी (ता. २५) सायंकाळी सहाच्या सुमारास येथील संरक्षक भिंतीचा काही भाग कोसळला. घराला धोका निर्माण झाल्यामुळे त्यांनी स्थलांतर करण्याची तयारी दाखवली असून तातडीने मदत मिळावी, अशी मागणी केली आहे.