मोटार-दुचाकीच्या
अपघातात दोघे जखमी
रत्नागिरीः तालुक्यातील नेवरे गावाच्या अलीकडे हॅलीपॅडजवळील वळणावर मोटार आणि दुचाकीचा अपघात झाला. या अपघातामध्ये दोघे जखमी झाले. ग्रामीण पोलिसात संशयित मोटार चालकाविरुद्ध गुन्हा दाखल केला आहे. अभय अभिमन्यू शिरगावकर (वय ५५, रा. निवेंडी, रत्नागिरी) असे संशयित मोटार चालकाचे नाव आहे. ही घटना बुधवारी (ता. २३) सकाळी अकराच्या सुमारास नेवरे गावाच्या अलीकडे हॅलीपॅड रस्त्याच्या वळणावर घडली. संशयित चालक अभय शिरगावकर हे मोटर घेऊन निवेंडी ते रत्नागिरी असे जात असताना समोरून येणाऱ्या दुचाकीला जोरदार धडक दिली. या अपघातामध्ये दुचाकी चालक अर्थव जयदीप पाटील (वय १९) व त्याच्या पाठीमागे बसलेली त्याची मैत्रीण अर्चना कृष्णा (वय २०) ही दोघे जखमी झाले. तसेच दोन्ही वाहनांचे नुकसान झाले. या प्रकरणी पोलिस हेडकॉन्स्टेबल रोशन सुर्वे यांनी ग्रामीण पोलिसात तक्रार दिली. तक्रारीवरून पोलिसांनी संशयित मोटार चालकाविरुद्ध गुन्हा दाखल केला आहे. अधिक तपास ग्रामीण पोलिस अंमलदार करत आहेत.
------------
अलावा-जाकीमिऱ्या येथील
महिलेचा आकस्मिक मृत्यू
रत्नागिरीः शहरानजीकच्या अलावा-जाकीमिऱ्या येथील महिलेला श्वसनाचा त्रास जाणवू लागला. उपचारासाठी खासगी रुग्णालयात दाखल केले होते. अधिक उपचारासाठी जिल्हा शासकीय रुग्णालयात दाखल केले असता तेथील वैद्यकीय अधिकाऱ्यांनी तिला तपासून मृत घोषित केले. भाग्यश्री रमेश मयेकर (वय ५४, रा. अलावा, जाकीमिऱ्या-रत्नागिरी) असे मृत महिलेचे नाव आहे. ही घटना गुरूवारी (ता. २४) दुपारी पावणेदोनच्या सुमारास जिल्हा रुग्णालयात घडली. पोलिसांकडून मिळालेल्या माहितीनुसार, भाग्यश्री मयेकर यांना रात्री श्वास घेण्यास त्रास जाणवू लागल्याने उपचारासाठी खासगी रुग्णालयात दाखल केले होते. अधिक उपचारासाठी जिल्हा रुग्णालयात दाखल केले असता वैद्यकीय अधिकाऱ्यांनी तपासून मृत घोषित केले. शहर पोलिसात आकस्मिक मृत्यूची नोंद केली आहे.