‘उत्पादन शुल्क’चे तीन हजार छापे
४० हजार लिटर दारू जप्त ; १३ वाहने जप्त
सकाळ वृत्तसेवा
रत्नागिरी, ता. २६ : राज्य उत्पादन शुल्क विभागाने वर्षभरात विविध ठिकाणी छापे टाकून तीन हजारपेक्षा अधिक गुन्हे दाखल केले आहेत. त्यामध्ये सुमारे २ कोटी ७५ लाखांचा मुद्देमाल जप्त केल्याची माहिती विभागातील अधिकाऱ्यांनी दिली.
जिल्ह्यात मद्याचा महापूर आला आहे, असे म्हटले तर विश्वास बसणार नाही. २०२४-२५ या आर्थिक वर्षामध्ये थोडीथोडकी नाही तर जिल्ह्यातील तळीरामांनी १ कोटी १० लाख लिटर दारू रिचवली आहे. या विक्रमी खपाबरोबरच बेकायदा मद्यविक्री आणि निर्मितीविरोधात उत्पादन शुल्क विभागाने केलेल्या धडक कारवाई केली. वर्षभरात तीन हजारांहून अधिक गुन्हे दाखल करून २ कोटी ७५ लाखांहून अधिक मुद्देमाल जप्त केला आहे. अनधिकृत मद्यविक्रीला आळा घालण्यासाठी उत्पादन शुल्क विभागाने जोरदार मोहीम राबवली. वर्षभरात ३ हजारांहून अधिक गुन्हे दाखल करण्यात आले असून, १३ वाहने जप्त करण्यात आली आहेत. विशेष म्हणजे हातभट्टी दारूविरोधात या विभागाने कडक कारवाई करत सुमारे ४० हजार लिटर हातभट्टी दारू जप्त केली आहे.

चौकट...
नूतनीकरणातून सव्वादोन कोटी महसूल
तालुकानिहाय परमीट रूम, बिअरशॉपीतून राज्य उत्पादन शुल्क विभागाला सव्वादोन कोटीचा महसूल मिळाला आहे. राजापूर तालुक्यात २३ परवानाधारक, लांजा १६, रत्नागिरी ७६, संगमेश्वर २४, चिपळूण ५१, गुहागर १७, खेड ३३, मंडणगड ८, दापोली २५ परवानाधारक आहेत.