मुस्लिम समाजातर्फे चिपळुणात
मंगळवारी गुणवंताचा सत्कार
चिपळूण : मुस्लिम समाजातर्फे समाजातील शालेय व महाविद्यालयीन परीक्षांमध्ये उल्लेखनीय यश संपादन करणाऱ्या विद्यार्थ्यांचा गुणगौरव सोहळा २९ जुलैला सकाळी १० वाजता मल्टीपर्पज सेंटर येथे करण्यात येणार आहे. गुणवंत विद्यार्थ्यांचे मनोबल वाढवण्यासाठी हे एक महत्त्वाचे पाऊल आहे. या वेळी जागतिक दर्जाचे मार्गदर्शक व कौन्सिलर ऐहसान शेख यांचे मार्गदर्शन आयोजित केले आहे. विद्यार्थ्यांना जीवनात योग्य दिशा व आत्मविश्वास मिळावा, या हेतूने ते उपस्थित राहून संवाद साधणार आहेत. या कार्यक्रमाला उपस्थित राहावे, असे आवाहन चिपळूण मुस्लिम समाजातर्फे करण्यात आले आहे.

चिपळुणात ठाकरे शिवसेनेतर्फे
आज विविध कार्यक्रम
चिपळूण : शिवसेना उद्धव बाळासाहेब ठाकरे चिपळूण तालुका कार्यकारिणीची बैठक तालुकाप्रमुख बळिराम गुजर यांच्या मार्गदर्शनाखाली नुकतेच प्राथमिक शिक्षक पतपेढीच्या सभागृहात झाली. या बैठकीत उद्या (ता. २७) होणाऱ्या पक्षप्रमुख उद्धव बाळासाहेब ठाकरे यांच्या वाढदिवसानिमित्त आयोजित कार्यक्रमाचा आढावा घेण्यात आला. पक्षप्रमुख उद्धव ठाकरे यांच्या वाढदिवसानिमित्त विविध कार्यक्रमांचे आयोजन करण्यात येणार आहे. या बैठकीत सुरुवातीला पक्षाचे विभागप्रमुख अनिल गुजर व शाखाप्रमुख शिवाजी मोरे यांना भावपूर्ण श्रद्धांजली वाहण्यात आली.

खुल्या प्रवर्गातील विद्यार्थ्यांचा
‘कृषी’चा प्रवेश सुकर
चिपळूण ः नुकत्याच बारावी उत्तीर्ण होऊन कृषी पदवी अभ्यासक्रमासाठी प्रवेश घेणाऱ्या विद्यार्थ्यांसाठी राज्य सामायिक प्रवेशपरीक्षा कक्षातर्फे महत्त्वाचा निर्णय घेतला आहे. खुल्या प्रवर्गातील विद्यार्थ्यांना बारावी विज्ञान शाखेत ४५ टक्के गुण असतील तर तो कृषी अभ्यासक्रमाच्या प्रवेशासाठी पात्र ठरणार आहे. आमदार शेखर निकम यांनी वारंवार केलेल्या पाठपुराव्याला हे यश आले आहे. पूर्वीच्या नियमानुसार, खुल्या प्रवर्गातील विद्यार्थ्यांना ५० टक्के गुणांची अट होती. त्यामुळे सर्वसामान्य गुणवत्ता असणारे अनेक विद्यार्थी कृषी अभ्यासक्रमाची आवड असतानाही प्रवेशापासून वंचित राहात होते. या प्रश्नावर आमदार निकम यांनी विधानसभेत आवाज उठवला होता. त्याची दखल घेत ही अट शिथिल करण्यात आली आहे.