80107

कुडाळमध्ये पर्यावरण रक्षणाचा संदेश

क. म. शि. प्र. मंडळाच्या इंग्रजी शाळेत उपक्रम

सकाळ वृत्तसेवा
कुडाळ, ता. २६ ः क. म. शि. प्र. मंडळाची इंग्रजी माध्यम प्राथमिक शाळा, कुडाळ येथे ‘इको क्लब फॉर मिशन लाईफ’ या कार्यक्रमाअंतर्गत ‘पर्यावरण पूरक सर्जनशीलतेचा उत्सव’ हा कार्यक्रम उत्साहात साजरा करण्यात आला.
या कार्यक्रमाचे मुख्य उद्दिष्ट विद्यार्थ्यांमध्ये पर्यावरण रक्षणाविषयी जागरूकता निर्माण करणे हे होते. यामध्ये पर्यावरण पूरक भित्तिचित्रे, बुक मार्क यातून पर्यावरण रक्षणाचे संदेश देण्यात आले. संतुलित आहार व असंतुलित आहार यामधील फरक प्रात्यक्षिक करून दाखवण्यात आला. आपल्या परिसरातील औषधी वनस्पती, फुलझाडे यांची माहिती दिली. या कार्यक्रमासाठी मुलांनी केळी व आंब्यांच्या पानांपासून तोरणे बनवली होती. तसेच मुलांनी ई-कचऱ्याचे व्यवस्थापन कसे करता येईल याविषयी माहिती दिली. विद्यार्थ्यांनी बनवलेल्या टाकाऊ वस्तूंपासून उपयुक्त आणि आकर्षक वस्तू मांडण्यात आल्या होत्या. कोकणात मिळणाऱ्या विशेषतः पावसामध्ये उगवणाऱ्या विविध रानभाज्यांचे प्रदर्शन देखील यावेळी मांडण्यात आले. या कार्यक्रमाचे मुख्य आकर्षण सातवीच्या विद्यार्थ्यांनी सादर केलेला ‘पपेट शो’ ठरला. या शोच्या माध्यमातून विद्यार्थ्यांनी पर्यावरण रक्षणाचा संदेश दिला. या कार्यक्रमास प्रमुख पाहुणे म्हणून मुमताज शेख उपस्थित होत्या. तसेच प्रशालेतील इतर शिक्षकही उपस्थित होते. पालकांनी देखील या कार्यक्रमास भेट दिली. या कार्यक्रमाचे आयोजन प्रशालेच्या सहशिक्षिका सौ. पूजा खानोलकर यांनी केले.