नेमळे शिक्षण संस्थेतर्फे
पुरस्कारांसाठी आवाहन
सावंतवाडी ः नेमळे पंचक्रोशी शिक्षण संस्थेतर्फे शिक्षक दिनानिमित्त जिल्ह्यातील दोन उपक्रमशील शिक्षकांना पुरस्कार प्रदान करून गौरविले जाते. हे पुरस्कार ५ सप्टेंबर, शिक्षक दिनी जाहीर केले जातात. येत्या शैक्षणिक वर्षातही असे दोन पुरस्कार प्रदान करावयाचे असल्याने जिल्ह्यातील उपक्रमशील शिक्षकांनी आपल्या माहितीचे प्रस्ताव १५ ऑगस्टपर्यंत संस्थेकडे पाठवावेत, असे आवाहन नेमळे शिक्षण संस्थेचे अध्यक्ष आत्माराम राऊळ यांनी केले आहे.‌ यातील पहिला पुरस्कार हा गुरुवर्य ज. भा. पेंढारकर यांच्या स्मृतिप्रीत्यर्थ श्रीमती नलिनी ज. पेंढारकर यांनी पुरस्कृत केला असून या पुरस्कारासाठी जिल्ह्यातील उपक्रमशील पुरुष शिक्षकांनीच आपल्या माहितीचे प्रस्ताव पाठवावयाचे आहेत. दुसरा पुरस्कार हा सहकारमहर्षी शिवरामभाऊ जाधव यांच्या पत्नी प्रमिला शिवराम जाधव यांच्या स्मृतिप्रीत्यर्थ सहकारमहर्षींच्या मित्र परिवाराने पुरस्कृत केला असून या पुरस्कारांसाठी जिल्ह्यातील केवळ शिक्षिकांनीच प्रस्ताव पाठवावयाचे आहेत. पुरस्काराचे स्वरूप रोख रक्कम, शाल, श्रीफळ व प्रमाणपत्र असे आहे. शिक्षकांनी १५ ऑगस्टपूर्वी आपल्या दोन छायाचित्रांसह प्राचार्या श्रीमती कल्पना बोवलेकर, नेमळे पंचक्रोशी माध्यमिक व उच्च माध्यमिक वि‌द्यालय, नेमळे यांच्याकडे प्रस्ताव पाठवावेत.
---------------
बांदा येथे ३० ला
‘कविता’ कार्यक्रम
बांदा ः येथील नट वाचनालयाचे माजी उपाध्यक्ष सुभाष मोर्ये यांच्या दुसऱ्या स्मृतिदिनानिमित्त बुधवारी (ता. ३०) दुपारी ३.३० वाजता प्रसिद्ध मालवणी कवी दादा मडकईकर यांचा पावसाळी कविता सादरीकरणाचा कार्यक्रम होणार आहे. हा कार्यक्रम पीएमश्री जिल्हा परिषद केंद्रशाळा बांदा क्र. १ येथे होणार आहे. या कार्यक्रमाला सर्व साहित्यप्रेमींनी उपस्थित राहावे, तसेच यावेळी इच्छुकांनी स्वरचित पावसाळी कविता सादर कराव्यात, असे आवाहन वाचनालयाने केले आहे.