निकाळजे यांना विद्यावाचस्पती पदवी
सकाळ वृत्तसेवा
साडवली, ता. २६ : देवरूख शिक्षण प्रसारक मंडळाच्या आठल्ये-सप्रे-पित्रे महाविद्यालयाच्या स. का. पाटील आंतरशाखीय संशोधन केंद्रातून समाधान निकाळजे हे विद्यावाचस्पती पदवी मिळवणारे चौथे संशोधक ठरले आहेत. डॉ. निकाळजे यांनी रसायनशास्त्र या विषयात ही पदवी मिळवली आहे. तसेच त्यांचे गाईड एएसपी महाविद्यालयातील प्राध्यापक डॉ. अमित व्हराळे या दोघांचेही संस्थाध्यक्ष सदानंद भागवत यांनी विशेष कौतुक केले आहे.
देवरूखसारख्या फक्त १२ हजार लोकवस्तीच्या गावामध्ये आंतरशाखीय संशोधन केंद्रासारखी सुविधा असणे आणि या सुविधेचा उपयोग कोकण तसेच पश्चिम महाराष्ट्रातील विद्यार्थ्यांनी करणे ही संस्थेच्यादृष्टीने आनंद देणारी घटना आहे. देशाचा विकास म्हणजे देवरूख परिसरासारख्या दुर्गम भागांचा विकास आहे. देवरूख शिक्षण प्रसारक मंडळ ही संस्था कोकणातील पहिले स्वायत्त महाविद्यालय आहे. या ठिकाणी पहिले व्यावसायिक शिक्षणकेंद्र उभारून विकासामध्ये आपल्यापरीने चांगले योगदान देत आहे याचेही खूप समाधान वाटते, असे भागवत यांनी सांगितले.