80144

श्री लागवडीमुळे आर्थिक उत्पन्नात वाढ

अमोल करंदीकर ः देवली येथे शेतकऱ्यांना प्रशिक्षण

सकाळ वृत्तसेवा
मालवण, ता. २६ ः श्री भात पीक पद्धतीने लागवड तसेच गतनिर्मिती करून शेती केल्याने उत्पादन खर्चात बचत होण्यास मदत मिळेल आणि शेतकऱ्यांचे आर्थिक उत्पन्न वाढून तो संपन्न होईल, असे प्रतिपादन मंडळ कृषी अधिकारी अमोल करंदीकर यांनी देवली येथे केले.
तालुक्यातील देवली येथील रघुवीर तळाशीलकर यांच्या प्रक्षेत्रावर तालुका कृषी कार्यालयाच्या वतीने भात पीक श्री पद्धत लागवड शेतकरी प्रशिक्षण कार्यक्रम घेण्यात आला. यावेळी उपकृषी अधिकारी धनंजय गावडे यांनी भात पीक चटई रोपवाटिका श्री लावणी पद्धत याबद्दल शेतकऱ्यांना मार्गदर्शन केले.
कट्टा गुरामवाडी येथील प्रगतशील शेतकरी आनंद रावले यांनी स्वानुभवातून करत असलेल्या श्री भात पीक पद्धतीचे फायदे उपस्थितांना सांगितले. देवली येथील प्रगतशील शेतकरी सुदर्शन नाईक यांनीही आपले विचार मांडले. देवलीचे सरपंच श्याम वाक्कर यांनी कृषी विभागाच्या योजनांचा आणि नवनवीन तंत्रज्ञानाचा अवलंब करून गावातील शेतकऱ्यांनी शेती क्षेत्रात प्रगती करावी व गाव शेती संपन्न होण्यासाठी युवा शेतकऱ्यांनीही प्रयत्न करावेत, असे आवाहन केले. यावेळी ग्रामपंचायत सदस्य सचिन मालवणकर, युएनडीपी प्रकल्प सहयोगी आशिष जाधव, पीक विमा प्रतिनिधी प्राणिल नार्वेकर, कृषी सेवक किशोर कदम, गुरुनाथ पाटकर, सखी स्वयंसहायता महिला बचत गटाच्या अध्यक्षा निकिता चव्हाण, देवली गवाणवाडी येथील शेतकरी उपस्थित होते.