80165
80166

एम. के. स्कूलतर्फे आंजर्लेत सुवर्णदुर्ग गौरवयात्रा
युनेस्कोच्या यादीत किल्ल्यांचा समावेश; वेशभूषेतून इतिहास मांडला
सकाळ वृत्तसेवा
दापोली, ता. २७ ः छत्रपती शिवाजी महाराजांच्या महाराष्ट्रातील अकरा व तमिळनाडूमधील १ अशा १२ किल्ल्यांचा युनेस्कोच्या जागतिक वारसास्थळांमध्ये समावेश झाला आहे. या ऐतिहासिक आणि अभिमानास्पद घटनेचे औचित्य साधून आंजर्ले येथील एम. के. इंग्लिश स्कूलतर्फे ‘सुवर्णदुर्ग गौरवयात्रा’ काढण्यात आली. या माध्यमातून विद्यार्थ्यांमध्येच नव्हे तर ग्रामस्थांमध्ये शिवचरित्राची प्रेरणा आणि गडकिल्ल्यांबद्दलचा अभिमान जागवण्याचा प्रयत्न करण्यात आला.
सुवर्णदुर्ग गौरवयात्रा कार्यक्रमाची सुरवात मुख्याध्यापक गोरिवले यांच्या प्रस्ताविकाने झाली. त्यांनी विद्यार्थ्यांना देशाभिमान, इतिहासप्रेम आणि संघटनशीलतेचे महत्व विषद केले. त्यानंतर संस्थेचे अध्यक्ष सुरेश सरनोबत यांनी कार्यक्रमाचे औपचारिक उद्घाटन केले. यात्रेची सुरवात महाराजांच्या जयघोषाने, ध्येयमंत्राने करण्यात आली. ही यात्रा आंजर्ले हायस्कूल ते भंडारवाडा, पाखाडी, बिरवाडी, भैरी मंदिरमार्गे दुर्गादेवी मंदिरापर्यंत नेण्यात आली. शोभायात्रेत सहभागी झालेल्या विद्यार्थ्यांनी छत्रपती शिवाजी महाराज, माता जिजाऊ, मावळे, संत-महंत यांची वेशभूषा करून इतिहासाचा जिवंतपट समोर ठेवला. ढोलताशा पथक, खालूबाजा पथक, शिवशंभू पालखी, मैदानी खेळ, शस्त्रधारी मावळे इत्यादींचा यात्रेत समावेश होता.
शोभायात्रेत आंजर्ले, मुर्डी परिसरातील जिल्हा परिषद शाळा, एम. के. इंग्लिश स्कूलचे विद्यार्थी, जय हनुमान मित्रमंडळ ताडाचाकोंड, शिवशंभू मित्रमंडळ, शिवगंगा क्रीडामंडळ मुर्डी, शिवशक्ती मंडळ बिरवाडी तसेच ग्रामस्थ सहभागी झाले होते. या वेळी राज्यमंत्री योगेश कदम यांच्या पत्नी श्रेया कदम या उपस्थित होत्या. शोभायात्रेनंतर दुर्गादेवी मंदिरात अॅड. आकाश महाराज भोंडवे यांचे शिवचरित्रावरील व्याख्यान झाले.