80322

जोशींच्या ‘फार्मिंग टूल’ची
पेटंट कार्यालयात नोंदणी

शेतकऱ्यांवर उपचाराची संकल्पना

देवगड, ता. २७ ः तालुक्यातील कातवण येथील जिल्हा परिषद पूर्ण प्राथमिक शाळेतील पदवीधर शिक्षक अमित जोशी (रा. वाडा, ता. देवगड) यांच्या ‘फर्स्ट एड किट इंटिग्रेटेड फार्मिंग टूल सेट’ या प्रथमोपचार संदर्भातील अभिनव डिझाइनची भारत सरकारच्या पेटंट कार्यालयात डिझाईन नोंदणी (डिझाईन रजिस्ट्रेशन) झाली आहे. या प्रथमोपचाराचा ग्रामीण भागातील शेतकऱ्यांना लाभ होऊ शकतो.
श्री. जोशी यांना डिझाईन नोंदणी क्रमांक ४५५८५५-००१ प्राप्त झाला आहे. ही नोंदणी १८ एप्रिलला मंजूर झाली असून प्रमाणपत्र १८ जुलैला प्राप्त झाले आहे. या संकल्पनेमागील कल्पना ही अत्यंत मानवी आणि गरजांशी संबधित आहे. शेतकरी शेतात काम करत असताना जर त्याला अचानक इजा झाली, तर त्याच्यासाठी तात्काळ प्राथमिक उपचार उपलब्ध होणे आवश्यक असते. ही गरज लक्षात घेऊन हे डिझाईन तयार केले आहे. या ‘फर्स्ट एड किट इंटिग्रेटेड टूल सेट’मध्ये एक बायोडिग्रेडेबल पाऊच जोडले आहे. त्यात हळद पावडर, तेल, डेटॉल, कापूस, दोरा (साप चावल्यास), वेदनाशामक गोळ्या आदी मूलभूत औषधे समाविष्ट आहेत. त्यामुळे शेतकरी इजा झाल्यास लगेच त्या ठिकाणीच आवश्यक उपचार करू शकतो आणि अधिक गंभीर स्थिती टाळता येते. याबाबत जोशी यांनी, ही संकल्पना केवळ नावीन्यपूर्ण नाही, तर ग्रामीण जीवनासाठी अत्यंत उपयुक्त आणि काळाची गरज असणारी आहे. अशा अभिनव कल्पनांना प्रोत्साहन देणे आवश्यक आहे, जेणेकरून देशातील शेती अधिक सुरक्षित व वैज्ञानिक पद्धतीने पुढे जाईल, असा विश्‍वास त्यांनी व्यक्त केला.