80374

स्वखर्चाने बुजविले रस्त्यावरील खड्डे

बांद्यात सामाजिक कार्य; विविध पक्षांच्या पदाधिकाऱ्यांसह ग्रामस्थांचा पुढाकार

सकाळ वृत्तसेवा
बांदा, ता. २७ ः प्रशासनाची वाट न पाहता बांदा शहरातील रस्त्यावर पडलेले जीवघेणे खड्डे आज शहरातील ग्रामस्थ व विविध पक्षांच्या पदाधिकाऱ्यांनी स्वखर्चाने बुजविले. यामुळे स्थानिकातून समाधान व्यक्त होत असून ग्रामस्थ्यांच्या सामाजिक कार्याचे कौतुक होत आहे.
शहरातील सर्व प्रमुख रस्त्यांवर खड्ड्याचे साम्राज्य पसरले आहे. वेळोवेळी प्रशासनाचे लक्ष वेधूनही खड्डे बुजविण्याबाबत दुर्लक्ष झाल्याने स्थनिकांनाच एकत्र येत खड्डे बुजविण्याचा निर्णय घेतला. बांदा-वाफोली रस्त्यावर निमजगा ते गडगेवाडी येथे रस्ता अक्षरशः पावसात वाहून गेला होता. याठिकाणी स्थानिकांच्या सहकार्याने सामाजिक कार्यकर्ते शामसुंदर धुरी यांच्या संकल्पनेतून गुरुनाथ सावंत, ज्ञानेश्वर सावंत, अजय महाजन, अभी देसाई यांनी स्वतः दिवसभर याठिकाणी हजर राहत सर्व खड्डे बुजविले. शहरातील प्रभाग क्रमांक ५ मधील रस्त्यावर पडलेले खड्डे ठाकरे शिवसेना शहरप्रमुख तथा ग्रामपंचायत सदस्य साईप्रसाद काणेकर, मनसे सावंतवाडी तालुका प्रमुख मिलिंद सावंत यांनी स्वखर्चाने बुजविले. बांदा पोलिस ठाणे रस्त्यावर पडलेला भलामोठा चर युवा नेते अर्णव स्वार यांनी स्वखर्चाने बुजवत एक आदर्श निर्माण केला आहे. शनिवारी (ता.२६) व आज दिवसभर रस्त्यावरील खड्डे बुजविण्यात आले. यासाठी स्थानिकांनी देखील सहकार्य केले.
----------
कोट
बांदा शहरातील अंतर्गत रस्त्यावर अक्षरशः भलेमोठे खड्डे पडल्याने अनेक छोटे मोठे अपघात झाले होते. वेळोवेळी लक्ष वेधूनही दुर्लक्ष होत असल्याने आपण स्वतः रस्त्यावर उतरून खड्डे बुजविण्याचा निर्णय घेतला. यासाठी स्थानिकांनी देखिल विशेष सहकार्य केले.
- शामसुंदर धुरी, सामाजिक कार्यकर्ते, बांदा