80545

एकाच वेळी घेता येणार दोन पदव्या

मुंबई विद्यापीठाकडून सुवर्णसंधी; सिंधुदुर्ग जिल्ह्यातील दोन महाविद्यालयांशी करार

सकाळ वृत्तसेवा
सावंतवाडी, ता. २८ ः मुंबई विद्यापीठ प्रथमच विद्यार्थ्यांसाठी सुवर्णसंधी घेऊन आले असून, विद्यार्थ्यांना आता एकाच वेळी कोणत्याही शाखेच्या दोन पदव्या घेता येणार आहेत. काही विद्यार्थी धकाधकीच्या जीवनात व्यस्त असतात, त्या विद्यार्थ्यांना पदवीचे शिक्षण घेता यावे, यासाठी मुंबई विद्यापीठाकडून हा निर्णय घेतला आहे. यासाठी मुंबई विद्यापीठाकडून सिंधुदुर्ग जिल्ह्यातील दोन महाविद्यालयांसमवेत करारही केला आहे.
यात सावंतवाडीतील श्री पंचम खेमराज महाविद्यालयाचा अग्रक्रमाने समावेश केला आहे. याबाबतची माहिती संचालक डॉ. शिवाजी सरगर यांनी दिली. ते आज महाविद्यालयात आयोजित पत्रकार परिषदेत बोलत होते. यावेळी प्रा. अनिल बनकर, प्रा. दिलीप भारमल, प्रा. मंदार भानुसे, डॉ. लिलाधर बंसोडे, प्रा. सुभाष वेलिंग आदी उपस्थित होते.
प्रा. सरगर म्हणाले, ‘धकाधकीच्या जीवनात कोणताही विद्यार्थी शिक्षणापासून आणि त्यापुढे पदवीपासून वंचित राहू नये, यासाठी मुंबई विद्यापीठाच्या टीमकडून पुढाकार घेतला आहे. यात बारावी आणि पदवीनंतर हे शिक्षण घेता येणार आहे. एम. कॉम. आणि एम. एस. सी. यांसारख्या तब्बल २८ अभ्यासक्रमांचा समावेश आहे. या वर्षीपासून हे अभ्यासक्रम सुरू होणार आहेत. संबंधित विद्यार्थ्याला एकाच वेळी दोन पदव्यांसाठी प्रवेश घेता येऊ शकतो. यात एका पदवीसाठी ७५ टक्के हजेरी महत्त्वाची आहे. दुसऱ्या अभ्यासक्रमासाठी हजेरीची अट नाही.’
एखादा विद्यार्थी राज्यातील कोणत्याही केंद्रामधून ही पदवी प्राप्त करू शकतो. कोकणात सात जिल्ह्यांत ही केंद्रे उपलब्ध केली आहेत. यात सिंधुदुर्गसह रत्नागिरी, रायगड, ठाणे, पालघर आदी जिल्ह्यांचा समावेश आहे, असे प्रा. सरगर यांनी सांगितले. यावेळी कोकणात पहिल्यांदा श्री पंचम खेमराज महाविद्यालयासमवेत करार करण्याचा मान देण्यात आला. लखमसावंत भोसले यांनी तो करार स्वीकारला.
..................
ऑनलाईन अभ्यासक्रम
संबंधित अभ्यासक्रमासाठी प्रवेश घेणारा विद्यार्थी ऑनलाईन पद्धतीने शिक्षण घेऊ शकतो. विशेष म्हणजे, हे अभ्यासक्रम मुंबई विद्यापीठाच्या माध्यमातून घेण्यात येणार असल्यामुळे त्याचा फायदा संबंधित विद्यार्थ्यांना होणार आहे. नियमित अभ्यासक्रम आणि पदवीच्या तोडीचीच ही पदवी आहे, असे प्रा. सरगर यांनी सांगितले.