हिंदी विषय
शिक्षकांची कार्यशाळा
चिपळूण : हिंदी विषय शिक्षकांच्या ज्ञानवृद्धीसाठी आणि अध्यापन कौशल्य वृद्धिंगत करण्याच्या उद्देशाने चिपळूण तालुका हिंदी अध्यापक मंडळ व पंचायत समिती यांच्यावतीने आयोजित एकदिवसीय कार्यशाळा परांजपे मोतीवाले हायस्कूल येथे झाली. कार्यशाळेच्या उद्घाटनप्रसंगी परांजपे मोतिवाले हायस्कूलचे मुख्याध्यापक भाऊसाहेब कांबळे, पर्यवेक्षक शिवाजीराव शिंदे, हिंदी समिती अध्यक्षा सलीमा नदाफ, तज्ज्ञ मार्गदर्शक युवराज जाधव व मानसी पेढांबकर यांच्या हस्ते दीपप्रज्वलन करण्यात आले. डॉ. तात्यासाहेब नातू महाविद्यालयाचे प्रा. युवराज जाधव यांनी ‘रोजगार की भाषा हिंदी’ या विषयावर मार्गदर्शन केले. त्यांनी हिंदी भाषेतील रोजगार संधी, तंत्रज्ञानाच्या सहाय्याने अध्यापन आणि विद्यार्थ्यांपर्यंत प्रभावी पोहोच कशी साधावी, याचे प्रात्यक्षिकासह सादरीकरण केले.
------
पाककृती स्पर्धेत
रूपाली तांबे प्रथम
दापोलीः डॉ. बाळासाहेब सावंत कोकण कृषी विद्यापिठांतर्गत उद्यानविद्या महाविद्यालयात चौथ्या वर्षाच्या विद्यार्थिनींनी ग्रामीण जागृती कार्यानुभव उपक्रमांतर्गत कुंभवे येथे २७ जुलै रोजी आजच्या फास्टफूडच्या जमान्यात रानभाज्यांचे औषधी महत्व अधोरेखित करण्यासाठी रानभाज्यांचे प्रदर्शन आणि रानभाज्या पाककृती स्पर्धा आयोजित केली होती. या प्रदर्शनात ५०हून अधिक भाज्यांचा सहभाग होता तसेच २९ पाककृती या स्पर्धेत सहभागी झाल्या होत्या. या कार्यक्रमाला ग्रामस्थांचा उत्स्फूर्त प्रतिसाद मिळाला. कार्यक्रमासाठी डॉ. आर. सी. गजभिये, सहयोगी अधिष्ठाता उद्यानविद्या महाविद्यालय दापोली, डॉ. एम. एम. कुलकर्णी, डॉ. सैतवाल तसेच कुंभवे गावचे सरपंच लक्ष्मण झाडेकर व इतर प्रमुख अतिथी उपस्थित होते. पाककृती स्पर्धेत प्रथम क्रमांक रूपाली तांबे, द्वितीय मनिषा शिगवण व तृतीय शमिका जोग यांनी पटकावले. त्यांना बक्षीस देऊन गौरवण्यात आले.
-----------
दाभोळ आरोग्य शिबिरात
१९० जणांचा सहभाग
दापोली ः महाजन बिल्डकॉनचे सर्वेसर्वा आणि युवा सामाजिक कार्यकर्ते मिहीर महाजन यांच्या वाढदिवसानिमित दाभोळ येथे मोफत आरोग्य तपासणी व शस्त्रक्रिया शिबिराचे आयोजन केले होते. परिसरातील विशेषत: ग्रामीण भागातील अनेक ज्येष्ठ नागरिक आणि गरजू रुग्ण यांना डोळ्यासमोर ठेवून हे शिबिर आयोजित केले होते. शिबिराचे उद्घाटन माजी आमदार विनय नातू, भाजप जिल्हाध्यक्ष सतीश मोरे, रा. स्व. संघाचे जिल्हा संघचालक सतीशभाई टोपरे, सुप्रसिद्ध डॉ. केतकर, डॉ. गोंधळेकर आणि मिहीर महाजन यांच्या उपस्थितीत झाले. शिबिरासाठी डेरवण येथील वालावलकर रुग्णालयातील डॉक्टरांची संपूर्ण टीम उपस्थित होती. यामध्ये बुरोंडी ते दाभोळ पट्ट्यातील १९० जणांनी सहभाग घेतला होता.