80847

देवगड तालुक्यात नागपंचमी उत्साहात

श्रावणातील पहिला सण; मंगळागौर पूजनाने आनंद द्विगुणित

सकाळ वृत्तसेवा
देवगड, ता. २९ ः तालुक्यात ठिकठिकाणी पारंपरिक पद्धतीने आज नागपंचमी हा श्रावणातील पहिला सण उत्साहाने साजरा झाला. श्रावणातील पहिली मंगळागौर हा सणही आज असल्याने महिलांचा उत्साह वाढला होता. पाऊस नसल्याने सणाचा आनंद अधिकच द्विगुणित झाला. मंगळागौर सणानिमित्त आज नवविवाहितांच्या घरी रात्री फुगड्या रंगणार आहेत.
कोकणात नागपंचमी सणाला विशेष महत्त्व आहे. श्रावण महिन्यातील येणारा हा पहिला सण. या दिवशी काही चाकरमानीही उत्सवासाठी गावी येतात. बाजारात विविध आकार आणि रंगांत नाग प्रतिमा विक्रीस असतात. साधारणतः ६० ते १२० रुपये नगाप्रमाणे नाग प्रतिमा विकल्या गेल्या. ग्रामीण भागात गणेश चित्रशाळांमध्ये नाग प्रतिमा उपलब्ध असतात. पारंपरिक ठिकाणाहून नाग प्रतिमा घेण्याची गावपातळीवर पद्धत असते. काही तरुण स्वतःच मातीच्या नाग प्रतिमा तयार करतात. सणासाठी लागणाऱ्या लाह्या, दूध, फळे, फुले यांची बाजारात उलाढाल असते. नागपंचमी सणाला बच्चे कंपनीची विशेष मौज असते. घरोघरी असलेल्या नाग प्रतिमांचे विसर्जन करण्यासाठी त्यांची धांदल असते. आज पाऊस नसल्याने उत्सवाची मजा वाढली होती. आजच श्रावणातील पहिला मंगळवार असल्याने नवविवाहितांच्या घरी मंगळागौर पूजनाची धांदल होती. या निमित्ताने रात्री फुगड्या रंगतील. एकूणच सणाची वाढती मजा सुरू होती.