80862
------------
कापसाळपर्यंतच्या उड्डाणपुलाचे अंदाजपत्रक बनवा
मंत्री शिवेंद्रराजे भोसलेः लवकरच चिपळूणला भेट देणार
सकाळ वृत्तसेवा
चिपळूण, ता. २९ः शहरातून जाणाऱ्या मुंबई-गोवा महामार्गावरील उड्डाणपूल कापसाळपर्यंत वाढवण्यासाठी सार्वजनिक बांधकाममंत्री शिवेंद्रराजे भोसले यांच्या उपस्थितीत आमदार शेखर निकम व महायुती शिष्टमंडळाची मंत्रालयात बैठक झाली. या बैठकीत कापसाळपर्यंत होणाऱ्या उड्डाणपुलाच्या कामाचे अंदाजपत्रक तयार करण्याच्या सूचना मंत्री भोसले यांनी दिल्या तसेच चिपळूणला भेट देऊन महामार्गाची पाहणी करण्याचे आश्वासनही दिले.
मुंबई-गोवा महामार्गावरील उड्डाणपूल कापसाळपर्यंत होण्यासाठी महायुती शिष्टमंडळ व आमदार शेखर निकम यांनी हालचाली सुरू ठेवल्या आहेत. त्यानुसार सार्वजनिक बांधकाममंत्री शिवेंद्रराजे भोसले यांच्या मंत्रालयातील दालनात सोमवारी बैठक झाली. बैठकीला आममदार निकम यांच्यासह महायुतीचे शिष्टमंडळ उपस्थित होते. बैठकीत कापसाळपर्यंत उड्डाणपुलाची आवश्यकता सविस्तरपणे आमदार व पदाधिकाऱ्यांनी मांडली. त्यावर मंत्र्यांनी राष्ट्रीय महामार्गच्या अधिकाऱ्यांना तत्काळ वाढीव उड्डाणपुलाच्या कामाचे अंदाजपत्रक तयार करण्याच्या सूचना दिल्या. शिवाय मुख्य अभियंत्यांनाही येथे पाहणी करण्याची सूचना केली. येत्या काही दिवसात चिपळूणला भेट देत स्वतः महामार्गाची पाहणी करण्याचे आश्वासन मंत्र्यांनी दिले. वाढीव उड्डाणपुलाचे अंदाजपत्रक केंद्र सरकारकडे पाठवण्यात येईल. त्याच्या मंजुरीसाठी केंद्रीय मंत्री गडकरी यांच्याकडे पाठपुरावा करण्याचे आश्वासन मंत्र्यांनी दिले.

चौकट
कामे मार्गी लावण्याच्या सूचना
महामार्गावर सातत्याने होणारे अपघात, नागरिकांचे हाल, सामाजिक प्रश्न, ज्येष्ठांना व विद्यार्थ्यांना भयमुक्त करण्यासाठी आवश्यक ठिकाणी गतीरोधक, पागनाका येथे सिग्नल व्यवस्था, कायमस्वरूपी पोलिस बंदोबस्त, पागनाका येथे फ्लाय फूटब्रीज करण्याची मागणी केली. सदरची कामे तत्काळ मार्गी लावण्याचे आश्वासन मंत्री भोसले यांनी दिले. त्यानुसार राष्ट्रीय महामार्गचे मुख्य अभियंता शेलार यांना सदरची कामे मार्गी लावण्याच्या सूचना केल्या.