80627

‘मोतिबिंदू मुक्त महाराष्ट्र’
मोहिमेस जिल्ह्यात प्रारंभ

सकाळ वृत्तसेवा
सिंधुदुर्गनगरी, ता. २९ ः राज्यामध्ये २२ जुलै ते २२ ऑगस्ट कालावधीत सर्व जिल्ह्यांमध्ये ‘मोतिबिंदू मुक्त महाराष्ट्र’ या विशेष मोहिमेची सुरुवात झाली आहे. सिंधुदुर्ग जिल्ह्यात २२ जुलैला जिल्हा रुग्णालय नेत्र विभाग येथे जिल्हा शल्यचिकित्सक डॉ. श्रीपाद पाटील यांच्या हस्ते मोहिमेचा प्रारंभ करण्यात आला.
यावेळी अतिरिक्त जिल्हा शल्यचिकित्सक डॉ. श्याम पाटील, नेत्रशल्य चिकित्सक डॉ. बी. एस. जोशी, डॉ. सुबोध इंगळे, डॉ. तुषार चिपळुणकर, अनिलकुमार देसाई आदी उपिस्थित होते. या मोहिमेमध्ये जिल्ह्यातील मोतिबिंदू रुग्णांवर मोफत उपचार केले जाणार आहेत. या मोहिमेचे प्रमुख उद्दिष्ट मोतिबिंदूच्या रुग्णांचे वेळीच निदान करणे, रुग्णांवर मोफत शस्‍त्रक्रिया करणे, अंधत्व रोखणे, ग्रामीण व दुर्गम भागातील नागरिकांपर्यंत सेवा पोहचविणे आहे. जिल्ह्यातील मोतिबिंदूग्रस्त रुग्णांनी जवळच्या शासकीय रुग्णालय, प्राथमिक आरोग्य केंद्र येथे जाऊन नेत्रचिकित्सा अधिकाऱ्यांकडून नेत्रचिकित्सा करून घ्यावी, असे आवाहन जिल्हा शल्यचिकित्सक डॉ. पाटील यांनी केले आहे.