swt303.jpg
80979
कुडाळ ः बॅ. नाथ पै शिक्षण संस्थेमध्ये कारगिल युद्धामध्ये शहीद झालेल्या जवानांना मानवंदना देताना प्राचार्य व विविध विभागांतील सहकारी, विद्यार्थी.

शहीद जवानांना कुडाळात मानवंदना
कारगिल विजय दिन ः बॅ. नाथ पै शिक्षण संस्थेचा उपक्रम
सकाळ वृत्तसेवा
कुडाळ, ता. ३० ः बॅ. नाथ पै शिक्षण संस्थेमध्ये कारगिल युद्धामध्ये शहीद झालेल्या जवानांना मानवंदना देण्यात आली. भारत पाक नियंत्रण रेषा ओलांडून काश्मीर मार्गे भारतामध्ये प्रवेश करू इच्छिणाऱ्या पाकिस्तान पुरस्कृत अतिरेक्यांना भारतीय जवानांनी ६० दिवस युद्ध करून २६ जुलै १९९९ ला परतवून लावून विजय साजरा केला. त्यामुळे हा दिवस भारतामध्ये ‘ऑपरेशन विजय’ किंवा ‘कारगिल विजय दिवस’ म्हणून साजरा केला जातो. या भ्याड हल्ल्यामध्ये ५२८ भारतीय जवान शहीद झाले होते, तर १३०० पेक्षा जास्त जवान जखमी झालेले होते. या हुतात्म्यांच्या त्यागाची, बलिदानाची आठवण म्हणून दरवर्षी बॅ. नाथ पै शिक्षण संस्थेमध्ये २६ जुलै हा दिवस कारगिल विजयी दिन म्हणून साजरा केला जातो.
संस्थेच्या प्रांगणात विजयस्तंभ उभारून त्यासमोर शहिदांना आदरांजली अर्पण करण्यात आली. याहीवर्षी चेअरमन उमेश गाळवणकर यांच्या मार्गदर्शनाखाली प्रा. अरुण मर्गज यांनी कारगिल विजय दिवसाची उपस्थितांना माहिती करून दिली. विविध विभागाच्या, अभ्यासक्रमाच्या प्राचार्यांच्या, शिक्षकांच्या, प्राध्यापकांच्या विद्यार्थ्यांच्या उपस्थितीत कारगिल युद्धामध्ये शहीद झालेल्या वीर जवानांना मानवंदना देण्यात आली.
यावेळी प्रसाद कानडे यांच्यासह नर्सिंग महाविद्यालयाच्या प्राचार्य कल्पना भंडारी व त्यांचे सहकारी, बॅ. नाथ पै सेंट्रल स्कूलच्या प्राचार्य चैताली बांदेकर व त्यांचे सहकारी, बॅ. नाथ पै ज्युनिअर कॉलेजचे प्रभारी प्राचार्य मंदार जोशी व त्यांचे सहकारी उपस्थित होते.