आंबडोस-व्हाळवाडीत
वासराचा लंपीमुळे मृत्यू
सकाळ वृत्तसेवा
ओरोस, ता. ३० ः आंबडोस (ता. मालवण) व्हाळवाडी येथील सतीश दळवी यांच्या वासराचा लंपीमुळे मृत्यू झाला. दरम्यान, पशुसंवर्धन विभागाने तत्काळ या भागातील जनावरांना लंपीची प्रतिबंधात्मक लस दिली आहे.
पंधरा दिवस आंबडोस गावातील व्हाळवाडी येथे लंपी आजाराने येथील गुरांना ग्रासले आहे. दळवी यांच्यासह भिकाजी फाटक, प्रकाश दळवी आणि दीपक करावडे यांच्या जनावरांनाही बाधा झाली आहे. मात्र, एवढा कालावधी उलटूनही शासनाच्या पशुसंवर्धन विभागाने याची दखल घेतली नव्हती. कोणीही प्रतिनिधी या भागामध्ये फिरकले नव्हते. त्यामुळे पशुपालकांनी तीव्र नाराजी व्यक्त केली. दरम्यान, नागपंचमीदिवशी दळवी यांच्या वासराचा लंपी आजाराने मृत्यू झाला. याबाबत जिल्हा पशुसंवर्धन विकास अधिकारी डॉ. सुधाकर ठाकूर यांना याबाबत कळविले. त्यांनी या विभागाचे अधिकारी डॉ. रवींद्र दळवी यांना तत्काळ माहिती दिली. डॉ. दळवी यांनी आंबडोस गावातील व्हाळवाडी येथे स्वतः भेट दिली. या वेळी त्यांनी जनावरांची तपासणी केली. तसेच ज्या पशुपालकांची सहमती होती, त्यांच्या जनावरांना लंपीची लस दिली. लंपीची आजाराची लागण प्रकाश दळवी, सतीश दळवी आणि दीपक करावडे यांच्या गुरांना झाली आहे. आता ही जनावरे बरी होत आली आहेत. भेट दिल्यावर डॉ. दळवी यांनी लंपी आजार झालेल्या जनावरांची देखभाल कशी केली पाहिजे, त्यांना अन्न आणि औषधे कोणती दिली पाहिजेत, याबाबत माहिती दिली.