जिल्हा परिषद कामकाज
विजेअभावी झाले ठप्प
सिंधुदुर्गनगरी, ता. ३० ः सिंधुदुर्ग जिल्हा परिषदेचा वीज पुरवठा आज सकाळपासून खंडित झाला होता. यामुळे प्रशासकीय कामकाज ठप्प झाले. जिल्हाभरातून आपल्या विविध कामांसाठी आलेल्या नागरिकांना याचा मोठा फटका बसला.
जिल्हा परिषद भवनातील वीज पुरवठा आज सकाळी ११ वाजल्यापासून खंडित झाला होता. यामुळे जिल्ह्याभरातून कामकाजासाठी आलेल्या नागरिकांना याचा फटका बसला. शासकीय सर्व डेटा संगणकात असल्याने कोणत्याही नागरिकांना आवश्यक असलेली माहिती तसेच दाखले व इतर कामाची आवश्यक कागदपत्रे मिळण्यास अडचण निर्माण झाली. जिल्ह्याच्या कानाकोपऱ्यातून आलेल्या नागरिकांना कामाशिवाय माघारी फिरावे लागले. तर शासकीय कर्मचाऱ्यांकडून लाईट नसल्याचे कारण पुढे करण्यात येत असल्याने काम होणार नाही या मानसिकतेमुळे नागरिकांनी माघारी फिरणे योग्य मानले. सिंधुदुर्गनगरीत कायमच विजेचा लपंडाव सुरू असतो. दिवसातून दोन ते तीन वेळा वीज खंडित होण्याचे प्रकार घडतात. मात्र, यावर उपाययोजना केल्याचे दिसून येत नाही. गेले दोन दिवस पावसाचे प्रमाण कमी असूनही वीज पुरवठा खंडित होणे आणि शासकीय कामकाज दिवसभर ठप्प होणे ही शोकांकिता आहे. जिल्हा परिषद भवनाला लागूनच असलेल्या जिल्हाधिकारी कार्यालय, जिल्हा पोलीस अधीक्षक कार्यालयात मात्र वीज पुरवठा सुरळीत होता. त्यामुळे जिल्हा परिषदमध्येच वीज पुरवठा खंडित का झाला? याचे नेमके कारण समजू शकलेले नाही.