81089

शिष्यवृत्ती, ऑलिंपियाड परीक्षेत
‘शांतिनिकेतन’चे विद्यार्थी चमकले

सकाळ वृत्तसेवा
सावंतवाडी, ता. ३० ः भाईसाहेब सावंत प्रतिष्ठान संचलित येथील शांतिनिकेतन इंग्लिश मीडियम स्कूलच्या विद्यार्थ्यांनी महाराष्ट्र शासनातर्फे घेतल्या गेलेल्या पूर्व उच्च प्राथमिक शिष्यवृत्ती परीक्षेत तसेच नॅशनल सायन्स ऑलिंपियाड फाउंडेशनतर्फे घेतल्या गेलेल्या हिंदी स्पर्धा परीक्षेत दिमाखदार यश प्राप्त केले.
प्रशालेचा शिष्यवृत्ती परीक्षेचा निकाल शंभर टक्के लागला. पाचवीतील प्रणित मेस्त्री हा शहरी सर्वसाधारण गुणवत्ता यादीत ५६ वा क्रमांक प्राप्त करत शिष्यवृत्तीचा मानकरी ठरला. हिंदी ऑलंपियाड स्पर्धा परीक्षेत आठवीची विद्यार्थिनी सानवी गावडे हिने द्वितीय स्तरावरील परीक्षेत कोकण विभागात द्वितीय क्रमांक प्राप्त करत रौप्यपदक व शिष्यवृत्ती प्राप्त केली. या यशस्वी विद्यार्थ्यांचे संस्थेचे कार्यकारी संचालक विक्रांत सावंत, उपाध्यक्ष नारायण देवरकर, सचिव व्ही. बी. नाईक, मुख्य कार्यकारी अधिकारी बाळासाहेब नंदीहळ्ळी, मुख्याध्यापक समीर परब व संस्थेच्या अन्य पदाधिकाऱ्यांनी अभिनंदन केले. या स्पर्धा परीक्षेसाठी मेहनत घेतलेल्या शिक्षकांसाठी गौरवोद्गार काढले.