81123

वर्गमित्रांनी दिला आठवणींना उजाळा
मालवणातील स्नेहमेळाः ‘सिंधुदुर्ग’च्या १९७५ च्या वर्गाचे सवंगडी
सकाळ वृत्तसेवा
मसुरे, ता. ३०ः स. का. पाटील सिंधुदुर्ग महाविद्यालय, मालवणच्या १९७५ ते १९७९ वाणिज्य शाखा या वर्गाच्या विद्यार्थ्यांचा सुवर्णमहोत्सवी स्नेहमेळावा बॅ. नाथ पै सेवांगण, मालवण येथे झाला. महाविद्यालयातील प्रवेशाला २१ जुलैला ५० वर्षे पूर्ण झाल्यानिमित्ताने या स्नेहमेळ्याचे आयोजन करण्यात आले. तारीख, वार तेच होते, हा योगायोग.
सेवांगणमध्ये मुंबई, पुणे, सांगली, कोल्हापूर, सावंतवाडी, रत्नागिरी, गोवा येथून आलेले सुमारे २३ माजी विद्यार्थी-विद्यार्थिनी उपस्थित होते. श्री सातेरी देवीचे बिळवस यात्रेदिवशी दुपारी दर्शन घेऊन सायंकाळी ५ वाजता पहिल्या सत्राची सुरुवात झाली. वाणिज्य शाखेच्या एकूण ४१ विद्यार्थ्यांमधून काही जण कामाच्या व्यापामुळे उपस्थित राहू शकले नाहीत. चर्चा, गप्पा आणि भोजनाचा कार्यक्रम झाला.
रविवारच्या सत्रात श्री क्षेत्र कुणकेश्वर, देवगड किनारा, पवन चक्की, पोखरबाव गणेश दर्शन असा धार्मिक पर्यटन कार्यक्रम झाला. मालवण बाजारपेठ फेरफटका मारून सायंकाळच्या सत्रात प्रत्येकाने मनोगत व्यक्त केले. यावेळी आमचे वर्गमित्र अरुण परुळेकर, शशिकांत पराडकर, अनिल शिरोडकर, मंदा देसाई यांना श्रद्धांजली वाहून त्यांच्या उत्तराधिकाऱ्यांना सुवर्णमहोत्सवी स्मृतिचिन्ह देऊन स्मृती जागृत केल्या.
मनोगतात आपापले तत्कालीन किस्से सांगून हास्य-विनोद करण्याचा मोह कुणाला आवरला नाही. सोमवारी सकाळी १० वाजता महाविद्यालयात पायी चालत पोहोचले. कॉलेजमध्ये प्रा. खोत यांनी सर्वांचे स्वागत केले. प्रा. नाईक यांची परवानगी घेऊन वर्गात सारे विद्यार्थी म्हणून वर्गात बसले, तेव्हा झालेला आनंद सर्वांच्या चेहऱ्यावर दिसत होता. दीपक सावंत, दीपक भोगटे, दीपक चव्हाण यांनी आठवणींना उजाळा दिला. उपस्थित शिक्षकांनी माजी विद्यार्थ्यांचा छोटेखानी सत्कार केला. विद्यार्थ्यांनी मानपत्र देऊन आजी-माजी अध्यापक, प्राध्यापक, प्राचार्य यांचा सत्कार केला. लेबर वेल्फेअर या विषयात यश मिळविलेल्या विद्यार्थिनींना पारितोषिके देऊन गौरविले.
यावेळी दीपक सावंत, उमेश नेरुरकर, दीपक चव्हाण, उमेश नेरुरकर, विजय गवाणकर, राजाराम राणे, नंदकुमार पारकर, दीपक भोगटे, हेमंत शिरोडकर, अनंत सूर्यवंशी, नितीन पाटकर, विजय साटविलकर, आनंद पारकर, जगदीश नेवाळकर, प्रकाश सावंत, नरेंद्र धुरत, गजानन अभ्यंकर, विनायक झांट्ये, लक्ष्मण कवठणकर, संध्या स्वार-अंधारी, माधुरी सामंत-वाघ, सुरेखा मुरवणे-जोशी आदी उपस्थित होते.