वालावलकरांनी आयुष्यभर समाजसेवा केली
डॉ. बिंदा परांजपे ः डेरवण येथे ९५वी जयंती
सकाळ वृत्तसेवा
चिपळूण, ता. ३१ : गुरूंच्या कृपेने साधलेले सर्व यश स्वतःचे न मानता संपूर्ण आयुष्य समाजसेवेसाठी अर्पण करणारे उदात्त व्यक्तिमत्त्व म्हणजे भक्तश्रेष्ठ कमलाकरपंत वालावलकर हे होते, असे गौरवोद्गार वाराणसी येथील बनारस हिंदू विद्यापीठाच्या अधिष्ठाता डॉ. बिंदा परांजपे यांनी काढले.
डेरवण येथे भक्त श्रेष्ठ कमलाकरपंत लक्ष्मणराव वालावलकर यांच्या ९५व्या जयंतीनिमित्त पार पडलेल्या कार्यक्रमात त्या बोलत होत्या. या वेळी त्या म्हणाल्या, सद्गुरू दिगंबरदास महाराजांच्या मार्गदर्शनाखाली त्यांनी भक्तीला केवळ ध्यानापुरती न ठेवता ती शिक्षण, आरोग्य, ग्रामविकास आणि संस्कृती रक्षणाच्या कार्यातून कृतीत उतरवली. त्यांच्या औदार्यातून इंग्रजी माध्यमाची शाळा, गुणवत्तापूर्ण व मूल्याधिष्ठित शिक्षणाची परंपरा तसेच कोकणातील रुग्णांसाठी जीवदान ठरलेले रुग्णालय उभारले गेले. गरीब-श्रीमंत भेद न करता हजारो रुग्णांना उत्तम वैद्यकीय सेवा मिळू लागल्या. कीर्तीची अपेक्षा न ठेवता केवळ देत राहणारे, कर्मयोगावर श्रद्धा ठेवणारे आणि सेवेतच भक्ती मानणारे हे विनम्र व्यक्तिमत्त्व आजही प्रेरणादायी आहे. त्यांच्या जयंतीचा खरा अर्थ म्हणजे त्यांच्या आदर्शातून शिकून समाजासाठी काहीतरी योगदान देण्याचा संकल्प करणे हा होय.
या वेळी डॉ. परांजपे यांचा रुग्णालयाच्या संचालिका डॉ. सुवर्णा पाटील यांच्या हस्ते सत्कार करण्यात आला तसेच संस्कृत, स्पॅनिश, जर्मन आणि इंग्रजी भाषेमधून विद्यार्थ्यांनी भक्तश्रेष्ठ वालावलकर यांच्या जीवनावर चरित्रावर भाषणे सादर केली. कार्यक्रमाला संचालिका शरयू यशवंतराव, क्रीडा संचालक श्रीकांत पराडकर, प्राचार्य तेजल सुर्वे, प्राचार्य चंद्रशेखर एल. आदी उपस्थित होते.