रत्नागिरीतील अंगणवाडी
मदतनीसची पदभरती
रत्नागिरी : एकात्मिक बालविकास सेवा योजना प्रकल्प रत्नागिरी २ मार्फत कळझोंडी, सडेवाडी, वैद्यलावगण, आगवे धनगरवाडा, करबुडे कुंभारवाडा येथील अंगणवाडी केंद्रात अंगणवाडी मदतनीस रिक्त पद भरावयाचे आहे. इच्छुक स्त्री स्थानिक उमेदवारांनी ८ ऑगस्टपर्यंत बालविकास प्रकल्प अधिकारी यांच्याकडे अर्ज सादर करावयाचे आहेत. बालविकास प्रकल्पाचे कार्यालय जिल्हा परिषदेजवळ शंखेश्वर पार्क अपार्टमेंटमध्ये आहे. अधिक माहितीसाठी सुटीचे दिवस वगळून कार्यालयीन दिवशी सकाळी ९.४५ ते सायंकाळी ६.१५ या वेळेत संपर्क साधावा.

सावर्डे महाविद्यालयात
प्रेमचंद जयंती
सावर्डे : सावर्डे येथील कला व विज्ञान महाविद्यालयात हिंदी साहित्यातील थोर कथाकार व कादंबरीकार मुंशी प्रेमचंद यांची जयंती उत्साहात साजरी करण्यात आली. कार्यक्रमाची सुरुवात प्रेमचंद यांच्या फोटोला पुष्पहार अर्पण करून झाली. कार्यक्रमाचे प्रमुख मार्गदर्शक म्हणून हिंदी विभागप्रमुख यांनी आपल्या प्रभावी भाषणातून प्रेमचंद यांच्या साहित्याचा समाजावर झालेला दूरगामी परिणाम अधोरेखित केला. त्यांच्या गोदान, गबन, कर्मभूमी यांसारख्या कादंबऱ्यांतील वास्तववाद, सामाजिक अन्यायावरील भाष्य व शोषितांच्या जीवनाचे संवेदनशील चित्रण विद्यार्थ्यांना प्रेरणादायी ठरेल, असे मत त्यांनी व्यक्त केले. या वेळी प्रा. दीप्ती शेंबेकर, प्रा. अवनी कदम, प्रा. पूजा आवले, प्रा. माधुरी जाधव, प्रा. सुनील जावीर आणि महाविद्यालयातील विद्यार्थी उपस्थित होते.