-rat२p२८.jpg-
२५N८१७१२
दापोली ः आंदोलनावेळी महाविकास आघाडीच्या कार्यकर्त्यांशी चर्चा करताना महावितरणचे अधिकारी.
---
वीजमीटर सक्तीविरोधात ‘आघाडी’ आक्रमक
महावितरण अधिकाऱ्यांना धरले धारेवर : आंदोलनाचा इशारा
सकाळ वृत्तसेवा
दापोली, ता. २ ः तालुक्यात घरगुती ग्राहकांना जबरदस्तीने प्री-पेड वीजमीटर बसवले जात असल्याच्या निषेधार्थ महाविकास आघाडीच्या कार्यकर्त्यांनी शुक्रवारी (ता. १) महावितरणच्या दापोली कार्यालयात धडक दिली. मीटर बसवणाऱ्या कंपन्यांकडून जबरदस्ती, धमकी आणि काही बंद घरांमधून विनापरवाना मीटर बसवले जात असल्याचा आरोप करत कार्यकर्त्यांनी महावितरणच्या अधिकाऱ्यांना धारेवर धरले.
ठाकरे शिवसेना, काँग्रेस आणि राष्ट्रवादी काँग्रेस (शरद पवार गट) या महाविकास आघाडीतील प्रमुख पक्षांचे दापोलीतील तालुकाप्रमुख ऋषिकेश गुजर, मंगेश मोरे आणि सचिन तोडणकर यांच्या नेतृत्वाखाली हे आंदोलन केले. मुख्यमंत्री देवेंद्र फडणवीस यांनी अधिवेशनात प्री-पेड मीटर सक्ती नसल्याचे स्पष्ट सांगितले असूनही दापोलीत मीटर बसवले जात आहेत.
महावितरणच्या उपविभाग १चे उपकार्यकारी अभियंता अरविंद कुकडे आणि उपविभाग २चे उपकार्यकारी अभियंता नीलेश बेंडाळे यांना आंदोलनकर्त्यांनी लेखी निवेदन सादर केले. प्री-पेड मीटर सक्ती रद्द करावी, कंपन्यांकडून होणाऱ्या गैरप्रकारांवर कारवाई करावी अन्यथा निर्माण होणाऱ्या असंतोषासाठी महावितरण जबाबदार राहील, असे निवेदनात म्हटले आहे.
शिवसेना तालुकाप्रमुख ऋषिकेश गुजर, राष्ट्रवादी काँग्रेसचे तालुकाध्यक्ष सचिन तोडणकर यांनी भूमिगत वीजवाहिन्यांमुळे ग्रामपंचायत हद्दीतील रस्ते खराब होत असल्याचे मुद्दे मांडले. रस्त्यांची दुरुस्ती कोण करणार यावर अधिकाऱ्यांकडे ठोस उत्तर नसल्याने ते अडचणीत सापडले.
महावितरणने या मागण्या वरिष्ठ अधिकाऱ्यांकडे पाठवण्याचे आश्वासन दिले; मात्र प्री-पेड मीटर सक्ती त्वरित रद्द झाली नाही तर महाविकास आघाडी अधिक तीव्र स्वरूपाचे आंदोलन छेडेल, असा थेट इशारा कार्यकर्त्यांनी दिला.