81849

लिंगेश्वर पावणाई भजन मंडळ प्रथम

तळवडेतील स्पर्धा; प्रकाश परब फाउंडेशनच्या उपक्रम

सकाळ वृत्तसेवा
सावंतवाडी, ता. ३ : तळवडे येथे नुकत्याच झालेल्या श्रावणमास चक्रीय नॉनस्टॉप भजन स्पर्धेत लिंगेश्वर पावणाई देवी भजन मंडळ कणकवली यांनी प्रथम क्रमांक पटकावून स्पर्धेचे विजेतेपद मिळविले. या स्पर्धेत जिल्हाभरातील भजन मंडळांनी सहभाग घेतला. (कै.) प्रकाश परब यांच्या स्मरणार्थ आमदार दीपक केसरकर पुरस्कृत तसेच शिवसेना तळवडे आणि प्रकाश परब फाउंडेशनतर्फे या स्पर्धेचे आयोजन केले होते.
स्पर्धेत द्वितीय क्रमांक महापुरुष प्रसादिक भजन मंडळ पिंगुळी, तृतीय क्रमांक सिद्धिविनायक प्रासादिक भजन मंडळ कणकवली, चतुर्थ क्रमांक सद्गुरू प्रासादिक भजन मंडळ कुडाळ यांनी पटकावला. कलेश्वर पूर्वीदेवी प्रासादिक भजन मंडळ वेत्ये यांना उत्तेजनार्थ पारितोषिक मिळाले. स्पर्धेत वैयक्तिक कलाकारांनाही त्यांच्या कामगिरीबद्दल विशेष पारितोषिके देऊन गौरविले. यात उत्कृष्ट हार्मोनियम वादक प्रथमेश निगुडकर (कलेश्वर पूर्वीदेवी प्रासादिक भजन मंडळ, वेत्ये), उत्कृष्ट झांज वादक म्हणून श्री. अनिकेत पाटकर (कलेश्वर पूर्वीदेवी प्रासादिक भजन मंडळ, वेत्ये), उत्कृष्ट तबला वादक प्रथमेश नाईक (लिंगेश्वर पावणाई, कणकवली), उत्कृष्ट पखवाज वादक तुषार लोट (सिद्धिविनायक, कणकवली), उत्कृष्ट गायक प्रसाद आमडोसकर (महापुरुष प्रासादिक भजन मंडळ), उत्कृष्ट कोरस वैभव सावंत (सद्गुरू संगीत प्रासादिक भजन मंडळ, कुडाळ) यांना सन्मानित करण्यात आले.
यावेळी प्रकाश परब फाउंडेशनचे अध्यक्ष सूरज परब यांच्यासह महेश परब, रोहित परब, बाळू कांडरकर, रमाकांत परब, सोमनाथ रेडकर, मेहल कांडरकर, ओंकार नाईक, नीतेश परब, रोहन परब, बबन काळे, सदाशिव परब, शत्तम सावंत आदी उपस्थित होते. प्रसाद आडेलकर यांनी सूत्रसंचालन केले. रुपेंद्र परब, रुपेश पवार यांनी परीक्षण केले.